DILI, 22 agostu 2022 (TATOLI)–Prezidente Komisaun Funsaun Públiku (KFP), Faustino Cardoso Gomes, husu ba Ministériu Edukasaun Juventude no Desportu (MEJD) atu halakon funsionáriu voluntáriu tanba konsidera viola ona prosesu sivil.
“Ita iha esperiénsia tinan 2010 to’o 2011 iha ema 12.000 resin hosi polítika ida konversaun, sira ne’ebé voluntáriu ka kontratadu ne’e konverte hotu ba funsionáriu permanente no ema sira ne’e kuaze mai hosi Ministériu Edukasaun Juventude no Desportu de’it. Agora ita laiha ona polítika konversaun,” Prezidente KFP hateten iha ninia knaar fatin, Matadoru, segunda ne’e.
Maski MEJD nafatin uza ninia polítika atu prepara voluntáriu sira ba kontratadu no kontratadu ba permanente, maibé KFP sempre fó hanoin katak laiha dalan atu halo.
“Sé de’it maka atu sai permanente tenke liuhosi selesaun prosesu konkursu públiku ne’ebé sei loke ba ema hotu iha ne’ebé de’it. Rezultadu teste mak sei determina inklui sira ne’ebé serbisu nanis no iha ona esperiénsia boot. Ita haree situasaun ne’e hosi kazu pur kazu no ita la aplika ba hotu-hotu, hanesan sira permanente ne’e situasaun ketak ida, sira kontratadu mós situasaun ketak ida. Agora ba sira voluntáriu, hafoin kontinua hetan aplikasaun ne’e tuir KFP rasik laiha dalan tanba ida-ne’e viola ona prosesu sivil,” nia tenik.
Notísia relevante: MEJD rekruta profesór voluntáriu 500 apoiu programa eskola iha uma
Tuir Faustino, instituisaun Estadu ka ministériu ne’ebé de’it maka hakarak uza ema ruma atu serbisu labele uza liafuan voluntáriu.
“Loloos ne’e aplika de’it maka kontratadu. Bele imajina ema ida maka serbisu voluntáriu de’it oinsá atu garante ninia moris,” nia akresenta.
Tanba ne’e, KFP rasik laiha dalan atu ema ne’ebé mai serbisu hahú uluk ho voluntáriu tiha hafoin hakat ba kontratadu no ikus sai funsionáriu permanente.
“Ne’e la autoriza iha komisaun nia laran. Sé maka hakarak sai funsionáriu permanente tenke liuhosi konkursu públiku no selesaun pur méritu,” nia fó hanoin.
Antes ne’e, MEJD rekruta profesór voluntáriu na’in-500 iha munisípiu Dili atu prepara hanorin alunu sira hosi edukasaun pré-eskolár no ensinu báziku siklu 1,2 liuhosi programa ‘eskola iha uma.’
Jornalista : Tomé Amado
Editora : Julia Chatarina
