iklan

EDUKASAUN, HEADLINE

MEJD rekruta profesór voluntáriu 500 apoiu programa eskola iha uma

MEJD rekruta profesór voluntáriu 500 apoiu programa eskola iha uma

Logotipu MEJD. Imajen/Espesiál

DILI, 18 jullu 2022 (TATOLI)–Diresaun Rekursu Umanu hosi Ministériu Edukasaun Juventude no Desportu (MEJD) hahú ona rekruta profesór voluntáriu na’in-500 iha munisípiu Dili, atu prepara hanorin alunu sira hosi edukasaun pre-eskolár no ensinu báziku 1,2 siklu liuhosi programa eskola iha uma.

Diretór Rekursu Umanu MEJD, Justino Varela, hateten, rekrutamentu ba profesór sira bazeia ba dadus ne’ebé rekolla ona iha tinan 2021 no inísiu tinan 2022.

“Ami halo rekrutamentu bazeia ba dadus sira ne’ebé ami rekruta hotu ona, liu-liu profesór voluntáriu edukasaun pre-eskolár inklui profesór ensinu báziku 1,2 siklu,” Diretór informa iha edifísiu MEJD, Vila verde, segunda ne’e.

Notísia relevante: MEJD promete sei aprezenta rekrutamentu profesór voluntáriu ba KM

Prosesu rekrutamentu ba profesór voluntáriu sira hahú iha loron 18 to’o 20 jullu 2021 no bainhira ramata maka kontinua ho selesaun dokumentu, ikus mai hirak ne’ebé prienxe kritériu mak sei asina kontratu iha loron 01 to’o 02 agostu 2022.

“Iha prosesu rekrutamentu to’o selesaun dokumentu ne’e, ami la halo teste eskrita no orál. Profesór voluntáriu ne’ebé maka ninia dokumentu prienxe kritériu maka sei hetan oportunidade,” nia akresenta.

Kritériu profesór voluntáriu atu apoiu atividade eskola iha uma, ba estudante pre-eskolár ho profesór nível sekundáriu maibé iha ona esperiénsia hanorin no ba estudante ensinu báziku ho profesór ho grau mínimu baxarelatu.

Programa pilotu ne’e ninia implementasaun dahuluk sei hahú iha munisípiu Dili, ne’ebé orsamentu programa ne’e rasik prevee ona iha orsamentu ratifikativu ho totál millaun $2,1, ba programa eskola iha uma inklui internet no biblioteka movel.

Dadus profesór hosi nível eskolaridade hotu ne’ebé maka eziste iha munisípiu Dili ne’e hamutuk 800 resin, ne’ebé kuandu halo separasaun ba edukasaun pre-eskolár no ensinu báziku hotu iha ema 570, kompostu hosi eskola privadu no eskola públiku.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!