DILI, 24 abríl 2024 (TATOLI) – Unidade empoderamentu ekonómiku ba feto iha Palásiu Prezidensiál Bairru-Pite Dili, kuarta ne’e reiza atividade sosializasaun resiklajen ho empreza timoroan Caltech no funsionáriu hotu, iha edifisiu Prezidente Repúblika.
“Prezidente Repúblika José Ramos Horta enkoraja kampaña sensibilizasaun kona-ba resiklajen lixu iha Palásiu Prezidensiál. Ho nune’e, Unidade Empoderamentu Ekonómiku ba Feto iha Prezidénsia Prezidensiál organiza ona atividade sosializasaun hamutuk ho ekipa Kompañia Caltech,” hatete iha nota ne’ebé Agência TATOLI asesu husi mídia Palásiu Prezidensiál, ohin.
Atividade ne’e ho nia objetivu prinsipál mak atu eduka funsionáriu sira iha Palásiu Prezidensiál, inklui funsionáriu sira husi Servisu limpeza PAX nian, kona-ba so’e lixu ho loos no promove prátika Redús, Reuzu (uza fila-fali) no Resikla (3R).
Iha okaziaun ne’e, funsionáriu sira aprende oinsá atu jere sira-nia lixu komesa husi sira-nia uma laran no agora bele pratika mós iha área Prezidénsia nian ne’ebé sei tau lixeira boot besik iha resintu parke Palásiu Prezidensiál.
Hanesan parte ida husi programa sensibilizasaun ne’e, Caltech mós hatudu sira-nia produtu oioin ne’ebé halo husi materiál resiklajen sira.
Produtu Resiklajen ida-ne’e ninia objetivu mak atu hatudu poténsia no valór hodi transforma lixu ba sasán util aleinde hamenus lixu iha Timor-Leste.
Tuir planu, Caltech sei instala lixeira resiklajen sira iha Palásiu hodi fasilita funsionáriu no hamoos-na’in hotu atu hahú prátika di’ak ida-ne’e. Prezidente Ramos Horta hein katak inisiativa ida-ne’e sei hatoman pratika di’ak atu jere lixu ne’ebé funsionáriu sira bele kontinua no habelar iha nasaun laran tomak.
Jornalista: Hortencio Sanchez
