OÉ-CUSSE, 30 abríl 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), aloka rihun $37 husi Orsamentu Jerál Estadu (OJE) 2024 nian atu finansia komemorasaun loron Restaurasaun Independénsia 20 Maiu 2024 ho desportu komunitária.
“Preparasaun ba loron restaurasaun 20 de maiu, komisaun organizadora ita iha ona, nia orsamentu ita aloka rihun $37 atu finansia eventu ne’e no atividdae sira hanesan desportu komunitáriu,” Sekretáriu Rejionál ba Asuntu Administrasaun, Andre La’o, ko’alia iha Oé-Cusse, tersa ne’e.
Nia hateten, atividade ne’ebé atu anima loron istóriku ne’e, sei iha atividade desportu komunitáriu, hanesan halai-kuda, dada-tali, sae-bua, iha postu administrativu sira mós sei halo hanesan ne’e.
“Tanba selebrasaun ne’e sei konsentra iha idak-idak nia postu administrativu no Prezidente Autoridade sei koloka membru Autoridade sira hodi ba partisipa atu lidera ho komunidade sira iha postu tolu seluk, Oésilo, Nítibe no Pássabe,” nia katak.
Jestór Sub-rejiaun Pante Makasar, Lorêncio da Cunha, halo ona preparasaun bodi koordena suku sira atu prepara hodi entegra ba iha desportu komunitáriu nian.
“Ami prepara ona tanba foin daudaun enkontru estabelesimentu komisaun ha’u mós tuir hotu, ne’ebé atividade sira hanesan halai-kuda dada-tali, sa’e-bua ne’e kada suku ami prepara tiha ona, tanba ha’u informa ona bá iha xefe suku sira, atu mai lori sira-nia ekipa ka grupu atu entegra ba atividade sira-ne’e,” nia katak.
Alende ne’e mós halo preparasaun, no mós fó aviza ba komunidade atu hasa’e bendera no mobiliza komunidade atu partisipa másimu iha loron selebrasaun 20 de Maiu ne’e,” nia katak.
Nia hateten, komesa loron 01 ba leten, sei fó sai aviza bá komunidade sira, liu-liu iha sub-rejiaun Pante Makasar atu hasa’e bandera iha uma oin, hodi relembra katak, loron independensia Timor-Leste mak 20 Maiu.
Jornalista: Abílio Elo Nini
Editór: Evaristo Soares Martins
