DILI, 08 maiu 2024 (TATOLI)– Jogadór Zidane Lopes (27), susesu salva nia ekipa Bita-Ba husi derrota kontra Surya Lafaek ho rezultadu 1-1, iha jogu kontinuasaun kopa Maun Boot Kay Rala Xanana Gusmão ne’ebé realiza iha Estádiu Munisipál Dili, kuarta ne’e.
Jogu entre ekipa rua hanesan jogu kontinuasaun husi jogu ne’ebé hala’o ona horiseik (07/05), ne’ebé la konsege termina tanba udan halo bee nakonu iha kampu laran, nune’e jogu tenke termina iha minutu 47. Tanba ne’e ohin jogu kontinua ho minutu 23 hodi halo kompletu.
Notisia relevante: Bee nakonu iha estádiu, Klube Surya Lafaek ho Bita-Ba hapara jogu iha minutu 47
Iha horiseik antes jogu para tanba bee nakonu kampu, jogadór Surya Divanio (22), konsege prodús ona golu hodi hatur rezultadu ba 1-0. Iha jogu ne’e hahú ekipa rua lansa kedan kontra no atake ba malu tuir tékniku no abilidade ekipa rua iha.
Jogu ne’e Bita-Ba lansa presaun ne’ebé másimu halo Surya book-aan araska iha kampo laran. Ho atake ne’ebé Bita-Ba halo la hamate Surya nia jogu no jogadór sira kontinua aguenta ho jogu.
Ho atake ne’ebé Bita-Ba lansa halo Surya la antisipa ho di’ak iha minutu 56 defeza Surya la antisipa halo erru hasoru jogadór Bita-Ba árbitru foti desizaun hodi fó penalidade. Iha sutu penaliade ne’e ezekuta husi jogadór Zidane Lopes konsege golu no muda rezultadu ba 1-1.
Golu ne’e lori Bita-Ba tenke sai husi derrota ne’ebé iha hodi fahe pontu ba malu 1-1 no jogu terimina laiha tan golu mak akontese.
Notisia relevante: Klube Zhavia FC empata ho Pilatus Buruma FC iha jogu kopa Xanana
Jornalista: Hortencio Sanchez
Editór : Florencio Miranda Ximenes
