DILI, 07 maiu 2024 (TATOLI)– Ekipa Surya Lafaek ho Bita-ba FC, obrigadu tenke kansela jogu iha, minutu 47 iha jogu kontinuasaun kopa Maun Boot Kay Rala Xanana Gusmão tanba udan halo bee nakonu iha Estádiu Munisipál Dili.
Jogu ne’e tenke hapara tanba udan maka’as no rezulta bee nalihun iha kampu laran halo jogadór sira labele pasa bola ba mai. Tanba ne’ebé árbitru deside hapara jogu. Bainhira sai mai li’ur árbitru hamutuk ho komisaun ba jogu hamutuk ho ofisiál ekipa rua nian tunda fali jogu ba aban (08/05), tuku 12:30 mak halo kompleta minutu restu ne’ebé sei falta 23.
Iha oras normál, bainhira udan seidauk mai jogu hahú ekipa rua lansa kedan kontra no atake ba malu tuir tékniku no abilidade ne’ebé iha. Maibé ekipa rua hatudu jogu ne’ebé seriu no la fó frakeza ba malu.
Surya Lafaek konsege hatama golu ida
Bita-Ba lansa kontra atake ne’ebé másimu maibé ekipa Surya halo defensivu ne’ebé metin hodi la fó fatin ba Bita-Ba atu lansa golu tuir sira nia hakarak.
Surya hala’o jogu ho ofensivu, pasa bola ba mai husi leten ka bola aas. Maibé Bita-Ba la fó fatin mós ba Surya atu ultrapasa liu grande área Bita-Ba nian. Ho forsa ne’ebé hanesan ekipa rua tenke termina jogu minutu primeira parte ho empata 0-0.
Haka’at ba segunda parte ekipa rua mantein kualidade jogu hodi anima adeptus sira ne’ebé nahe-aan barak iha tribun leten ne’ebé hakilar makas hodi fó suporta másimu ba sira nia ekipa favoritu.
Jogu la’o daudaun kalohan mós komesa hafalun ona loromatan nia roman. Halo nakukun ona Estádiu Munisipál Dili. Udan been komesa nakturu neneik, maibé jogadór sira iha kampo laran kontinua dansa ba mai ho bola ne’ebé kabuar ho tarjetu oinsa hatama bola ne’e ba rede laran atu manán.
Maske udan komesa turuk Surya esforsu aan makas hodi hatudu jogu bonitu ikus iha minutu 42, jogadór Divanio (22), konsge fura rede Bita-Ba hodi nakfilak rezultadu ba 1-0. Golu ne’e halo Bita-Ba sente triste maibé kontinua joga ho kalma.
Liu de’it minutu 8 udan komesa makas ataka Estádiu hodi provoka bee sa’e maka’as iha kampu laran, jogadór sira pasa bola ba mai la bele ona, nune’e árbutru tenke foti desizaun hodi hapara jogu ne’e.
Jogu ne’e hapara, maibé Surya provizóriu lidera jogu ho rezultadu 1-0. Maibé rezultadu finál sei hatudu iha aban meiu dia ba ekipa rua sé loos mak sai vitória.
Notisia relevante: Klube Zhavia FC empata ho Pilatus Buruma FC iha jogu kopa Xanana
Jornalista: Hortencio Sanchez
Editór: Florencio Miranda Ximenes
