OÉ-CUSSE, 07 maiu 2024 (TATOLI) – Sekretáriu Rejionál ba Asuntu Saúde, Luís de Jesus Neno, fó sai katak, Institutu Nasionál Farmasia Produtu Médiku (INFPM) kada fulan apoia ai-moruk kontainéer rua ba iha Hospitál Referál Oé-Cusse hodi fó atendimentu saúde ba komunidae sira iha Rejiaun Administrativa Espesiál Oé-Cusse Ambeno (RAEOA)
Tuir nia, tanba antes ne’e Autoridade RAEOA lideradu Prezidente Autoridade, Rogériu Tiago Lobato, selebra ona akordu ofisiál ho INFPM ba tinan ida nian, atu fornese ai-moruk.
“Ha’u rona informasaun, deputadu sira kestiona dehan ai-moruk iha Oé-Cusse estoke-out item 132 laiha, hanesan ema pesoál saúde ida, ha’u sente triste tanba realidade hatudu informasaun ne’e laloos, karik iha membru parlamentu sira tún ba baze, sei bele hasoru dirijente saúde sira, atubele relata dadus ho loloos, maibé sekuandu tuur de’it iha fatin, laiha informasaun halo levanta iha Parlamentu Nasionál, entaun informasaun laloos,” Luís de Jesus Neno, ko’alia iha Oé-Cusse, tersa ohin.
Notísia relevante: Autoridade RAEOA kontrata INFPM ho kustu rihun $511 atu fornese ai-moruk
Nia esplika, kuandu ai-moruk estoke out iha Oé-Cusse item 132 mak laiha signifika katak, atividade saúde iha Oé-Cusse paradu ona no laiha atendimentu tanba item barak mak estoke out.
“Maibé tuir ami-nia dadus, ita iha-ne’e estoke-out seidauk to’o 5%, signifika item haat ka hitu, ne’e mak laiha, ida-ne’e mós ita tenta iha nasionál, maibé estoke out laiha, tan ne’e husu komunidade kontinua hakbesik ba fasilidade saúde, atividade saúde Oé-Cusse la’o nafatin, ita mós asina akordu ho INFPM, kada fulan suporta ai-moruk karreta kontainer rua, sempre mai bazeia ami-nia pedidu,” nia informa.
Depoizde fasilidade saúde sira iha baze liu-liu postu saúde no sentru saúde, estoke out ne’e seidauk to’o 2%, signifika katak, ne’e normál nian, tanba estoke out sira-ne’e dalaruma iha nasionál mak laiha.
“Maibé ita espera katak, karik iha dadus ruma atu levante, tenke tún ba baze haree didi’ak ho matan, postu saúde sira, nune’e bele ko’alia bazea faktu, tenke konfirma direita ho ne’ebé mak kaer, kna’ar nune’e informasaun ne’e bele ita fó sai ba públiku bele loos,” nia informa.
Nia dehan, durante ne’e servisu saúde Oé-Cusse seidauk hetan vizita ofisiál husi membru parlamentu ida, maibé só husi komisaun F hasoru ona, hodi deskuti no hato’o informasaun ne’ebé mak iha, bazeia realidade iha baze.
Notísia relevante: Autoridade reativa atendimentu saúde iha Hospital Referál Oé-Cusse
Sekretáriu Rejionál ba Asuntu Saúde, Luís de Jesus Neno, ko’alia asuntu ne’e hodi responde Beputada Bankada FRETILIN, Sancia Paixão Bano, deklara iha Parlamentu Nasionál katak, ai-moruk item 132 estoke mamuk iha Hospital Referál Oé-Cusse Ambeno.
Jornalista: Abílio Elo Nini
Editór: Evaristo Soares Martins
