OÉ-CUSSE, 29 fevereiru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, kinta ne’e selebra kontratu ho Institutu Nasionál Farmasia Produtu Médiku (INFPM), ho kustu $511,000.00 hodi fornese ai-moruk ba Hospital Referénsia Oé-Cusse (HRO).
Notísia relevante: Prezidente Autoridade RAEOA deteta problema lima iha Hospital Referénsia Oé-Cusse
Prezidente Autoridade RAEOA, Rogério Tiago Lobato, informa, selebrasaun kontratu ne’e ho durasaun tinan ida nian, atu asegura fornesimentu ai-moruk ba fasilidade saúde sira, hodi fó tratamentu ba nesesidade povu nian.
“Molok atu haruka ai-moruk mai, primeiru tenke halo pagamentu, tán ne’e maka ohin ami asina, hodi asegura fornesimentu mai saúde RAEOA ho normalidade, tanba menus ai-moruk afeta ba ema moras no mate, entaun iha buka atu evita situasaun ida-ne’e, halo asinatura kontratu ida-ne’e hodi asegura fornesimentu ai-moruk mai iha Oé-Cusse,” Rogério Lobato, ba jornalista sira, hafoin selebra kontratu.
Iha biban hanesan, Diretór Ezekutivu INFPM, Brígido Simão de Deus, informa, selebrasaun akordu ne’e, realiza kada tinan, atubele kompra ai-moruk, ekipamentu médika no reajente ba servisu saúde Oé-Cusse Ambeno.
“Item barak tebes, komposta hosi medikamentu ekipamentu médiku, reajente, ho buat sira-ne’ebé maka atu funsiona sistema saúde loron loron nian, ne’ebé orsida iha lista ida, bazea lista ne’e ho osan ne’ebé maka manda ba INFPM nia konta, depois ita kompra bazea orsamentu ne’ebé iha,” nia katak.
Notísia relevante: Sekretáriu Rejionál Saúde Oé-Cusse la tolera pesoál saúde abandona serbisu
Entretantu, antes ne’e Autoridade RAEOA selebra kontratu ho Servisu Autónomu Medikamentu no Ekipamentu Saúde (SAMES), dezde 2020 tanba prosesu administrativamente, RAEOA iha jestaun rasik, tán ne’e iha tinan ne’e fó biban ba servisu INFPM atu halo prosesu prokuramen hodi kompra medikamentu no ekipamentu tanba RAEOA seidauk prontu iha aprovizionamentu.
Jornalista: Abílio Elo Nini
Editór: Evaristo Soares Martins
