OÉ-CUSSE, 27 fevereiru 2024 (TATOLI) – Sekretáriu Rejionál ba Asuntu Saúde, Luís de Jesus Neno, sei la tolera profisionál saúde sira-ne’ebé abandona serbisu fatin liuliu iha ospitál referénsia, sentru saúde no postu saúde sira iha Rejiaun Administrativa Espesiál Oé-Cusse Ambeno (RAEOA).
Luís de Jesus Neno, ko’alia asuntu ne’e, iha ámbitu abertura sensibilizaun kona-bá matadalan oinsá prevene moras rabies, hala’o iha salaun Dominikana Oé-Cusse, segunda ne’e.
Notísia relevante:Profisionál Saúde hanesan vokasaun atende pasiente sira
Eis Xefe Sentru Saúde sub-rejiaun Oésilo ne’e, hateten, komunidade sira iha direitu atu hetan asesu hosi atendimentu saúde, tan ne’e profisionál sira presiza hatudu profisionál ho dsiplina di’ak bainhira halo atendimentu.
Nia informa, daudaun tempu udan, moras barak sei mosu, tan ne’e pesoál saúde sira tenke iha fatin servisu, tanba dalaruma inan sira ba fasilidade atu partu, maibé pesoál saúde laiha fatin, bele partu de’it iha arreadór fasilidade saúde ne’e.
“Atende pasiente labele hirus, tanba nia presiza ita mak nia mai husu ajuda, Governu selu ita atu haree komunidade sira-nia problema, se hirus hamosu problema iha fasilidade saúde ita sei foti sansaun ba profisionál ne’ebé servisu laiha étika profisionál, no sei la tolera kaundu abandona servisu, ida-ne’e labele akontese, no lakohi simu keixa kona-bá asuntu ne’e,” Luís de Jesus Neno, ko’alia iha sensibilizaun ne’e.
Notísia relevante:Profisionál saúde sira presiza atende komunidade ho domin
Membru Autoridade RAEOA ne’e, fó hanoin, bainhira hetan destaka iha sub-rejiaun sira, presiza komunikasaun, labele falta beibeik no abandona serbisu, tan ne’e, nia promete halo monitorizasaun maibé laiha kalendariu, tama ho urjenti de’it, tanba fatin ne’ebé destaka ona, tenke servisu iha fatin ne’e.
“Ha’u husu ba pesoál saúde sira, ne’ebé destaka iha postu saúde no sentru saúde sira iha sub-rejiaun, suku no aldeia, serbisu ne’ebé mak ita simu tenke mantein nafatin iha fatin servisu, tanba ne’ebá iha fatin atu hela,” nia fó hanon.
Nia dehan, la’ós hela iha Oé-Cusse vila servisu iha Pássabe no iha Nítibe, ida-ne’e labele akontese, sei servisu iha Pássabe no Nítibe, tenke hela iha ne’ebá.
“Tanba ita-ne’e servisu profisionál, ita-nia direitu saláriu mós Estadu fasilita ho rejime profisionál, tanba ita atende pasiente iha oras normál hahú 08 to’o tuku 17:00 , maibé iha oras extra pasiente mai fanun ho kalan boot ba moras saida de’it, atu husu ita-nia tulun, tan ne’e ha’u husu ita presiza servisu hamutuk, nune’e komunidade tomak iha Oé-Cusse bele hetan atendimentu,” nia apela.
“Karik ita servisu ho laran, servisu tuir protokolu, servisu ho pasiénsia, espera katak ita bele redús moras ne’ebé maka akontese iha Oé-Cusse, ita mós bele redús ema mate no bele hasa’e kobertura indikadór ne’ebé Ministériu Saúde prefere mai,” nia tenik.
Tanba ne’e laiha problema ida kona-bá rekursu umanu, tanba iha marsu agora, sei hetan kolokasaun hosi Ministériu Saúde, Oé-Cusse hetan profisionál na’in-80 sei destaka iha Oé-Cusse, tantu iha ospitál, sentru saúde no postu saúde sira.
Notísia relevante:INSP-TL introdús matadalan prevene kazu rabies iha Oé-Cusse
Entretantu, totál fasilidade saúde iha Rejiaun Oé-Cusse, maka hanesan, ospitál referénsia, postu saúde lima (5) no sentru saúde 20, ho totál profisionál saúde na’in-300 resin.
Jornalista: Abílio Elo Nini
Editór: Evaristo Soares Martins
