Profisionál saúde sira presiza atende komunidade ho domin
OÉ-CUSSE, 07 fevereiru 2024 (TATOLI) – Sekretáriu Rejionál ba Asuntu Saúde, Luis de Jesus Neno, husu profisionál saúde sira-ne’ebé servisu iha sentru saúde no postu saúde sira iha Rejiaun Administrativa Espesiál Oé-Cusse Ambeno (RAEOA) atende komunidade sira ho domin.
Notísia relevate:Prezidente Autoridade RAEOA deteta problema lima iha Hospital Referénsia Oé-Cusse
“Horisehik ha’u hala’o vizita servisu ba sentru saúde Baqui, atu haree no husu tuir problema saida mak sira enfrenta, tanba ha’u foin asumi kargu ne’e, entaun presiza vizita ba fasilidade saúde sira atu hatene sira-nia problema, iha enkontru ne’e mensajen ne’e ita hato’o maka ne’e, hanesan profisonál saúde ita tenke atende komunidade sira ho respeitu no domin,” Luís de Jesus Neno, ba Agência Tatoli iha Oé-Cusse, kuarta ne’e.
Nia informa, tanba prioridade ba servisu saúde, primeiru tenke re-organiza atividade ne’ebé maka iha saúde tanba durante ne’e atividade balu la’o no balu paradu uitoan.
“Tan ne’e maka ita komesa hala’o vizita ba fasilidade saúde sira hotu, atu informa no identifika problema sira ne’ebé akontese, presiza hadi’a, tan ne’e maka ita hahú re-organiza pesoál saúde sira tenke servisu tuir étika profisionál, depois ita halo oinsá hatene kle’an liu ejizénsia komunidade kona-bá moras saida mak sira enfrenta presiza hadi’a,” nia katak.
Notísia relevante:Profisonál saúde 91 iha Oé-Cusse serbisu voluntária, 44 termina kontratu
Jornalista: Abílio Elo Nini
Editór: Evaristo Soares Martins
