OÉ-CUSSE, 06 fevereiru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, deteta problema lima akontese iha Hospital Referénsia Oé-Cusse, liuliu menus ai-moruk.
“Ha’u mai vizita tanba ha’u hakarak hatene kondisaun hospitál nian, haree moras sira, haree mós estoke ai-moruk nian ko’alia ho enfermeiru, pasiente no diretór sira iha ospitál, nune’e Autoridade tulun funsionamentu ospitál nian ho di’ak,” Rogério Lobato ba jornalista sira, hafoin vizita ofisiál ne’e iha ospital Oe-Cusse, tersa ne’e.
Notísia relevante: Arsénio Bano observa Hospital Referénsia Oé-Cusse
Nia informa, durante vizita ofisiál ne’e, Sekretário Rejionál Asuntu Saúde, relata problema kona-bá menus ai-moruk, tanba kompañia fornesedór hosi Servisu Autonómu Medikamentu no Ekipamentu Saúde (SAMES) kontratu termina ona iha loron 31 dezembru 2023.
“Ohin ha’u haree no rona ona esplikasaun hosi Sekretáriu saúde, kona-bá estoke ai-moruk, ha’u husu halo lista ai-moruk ne’ebé falta, atubele hetan fornesimentu lalais mai hospitál, tanba kompañia kontratu remata ona, Autoridade sei estende tan, nune’e bele rezolve ai-moruk iha ospitál, depois faze tuir bele halo kontratu foun,” nia informa.
Iha vizita ofisiál ne’e, Sekretáriu Rejionál ba Asuntu Saúde, Luís de Jesus Neno, hateten problema ne’ebé akontese iha ospitál iha asuntu lima, hanesan menus ai-moruk, no kontratu ba kompañia fornesedór sira.
“Ohin ami relata, iha problema lima maka ami mensiona ba Prezidente Autoridade, primeiru kona-bá ai-moruk, ita hatene katak, kontratu entre SAMES ho Autoridade RAEOA termina ona iha loron 31 dezembru 2023, entaun hosi janeiru mai to’o fevereiru ne’e, fornesimentu ai-moruk seidauk bele halo, tanba autoridade foun presiza haree fila-fali, nune’e bele renova akordu ka prosesu atubele suporta ai-moruk bele la’o ho di’ak,” nia informa.
Maibé ba ai-moruk iha ospitál Oé-Cusse, iha item 17 maka menus, maske seidauk estende kontratu ba kompañia maibé ho solusaun ida katak, presiza halo pedidu emerjénsia molok atu halo estensaun ba kompañia fornesedór.
“Iha servisu saúde rejionál sentru saúde lima no postu saúde 20, estoke-out ne’e só item haat (4) de’it, tán ne’e maka ita sura foin 1% ba asuntu seluk laiha problema,” nia informa.
Problema segundu, iha ospitál reférál Oé-Cusse, iha kompañia tolu, primeiru fornese ai-haan ba pasiente sira, kompañia daruak hala’o limpeza ba ospitál sentru saúde no postu saúde sira, kompañia datolu nian, hala’o seguransa.
“Kompañia tolu ne’e, sira-nia kontratu remata iha loron 31 dezembru 2023, mezmu seidauk kontratu foun ka estende maibé sira nafatin fornese, tán ne’e ohin ami hato’o ba Prezidente Autoridade atu iha tempu badak bele estende sira-nia kontratu nune’e bele kontinua fornese,” nia katak.
Notísia relevante :Estoke ai-moruk iha armazein Hospital Referénsia Oé-Cusse sufisiente
Jornalista: Abílio Elo Nini
Editór: Evaristo Soares Martins
