Arsénio Bano observa Hospital Referénsia Oé-Cusse
OÉ-CUSSE, 19 janeiru 2024 (TATOLI) – Prezidente Autoridade sesante iha Rejiaun Administrativa Espesiál Oe-Cusse Ambeno (RAEOA), halo observasaun bae stoke ai-moruk iha Hospital Referénsia Oe-Cusse (HRO).
Prezidente Autoridade sesante, Arsénio Paixão Bano, dehan, atu solusiona problema ne’e, Governu Sentrál presiza nomea ona autoridade foun, nune’e bele renova kontratu ho Servisu Autónomu Medikamentu no Ekipamentu (SAMES) ba fornesimentu ai-moruk.
“Ha’u mai haree de’it, ita sei bele aguenta iha ospitál maibé tempu lakleur, tanba ai-moruk semakin kurang, ita iha problema tanba seidauk iha kontratu asinadu ho SAMES ba 2024, entaun solusaun ne’e fasil Governu tenke nomea ona autoridade foun,” Arsénio Paixão Bano hateten iha ospitál Oé-Cusse, sesta ne’e.
Nia hateten, setór saúde ne’e iha Oé-Cusse sei enfrenta problema, ba postu saúde sira, tanba daudaun postu saúde ida iha sub-rejiaun Nítibe, Bítila taka provizória, tanba funsionáriu kontratadu sira termina ona kontratu iha 31 dezembru 2023 ne’e, iha mós postu neen (6) ameasadu bele taka.
Notísia relevante: Profisonál saúde 91 iha Oé-Cusse serbisu voluntária, 44 termina kontratu
“Maibé ita nafatin tanba dirijente saúde sira sei buka hela dalan, ha’u hanoin sei konsege rezolve ita bele aguenta lakleur, maibé solusaun ne’e fasil Governu tenke nomea ona autoridade foun atu haree situsaun sira-ne’e,” nia katak.
Administradora Hospital Referénsia Oé-Cusse, Angela Maria Marcela Teme, informa ai-moruk 17 iha ospitál refere sei hotu iha fulan-fevereiru nia rohan.
“Iha ai-moruk esensiál 17 maka iha lista, maibé ai-moruk seluk sei iha-ne’e, temporariamente sei bele aguenta, maibé ida-ne’e mós labele lori tempu naruk, bele too de’it fim janeiru ne’e ka bele to’o inísiu fevereiru, depende ba movimentu pasiente,” Angela Maria Marcela Teme, ko’alia iha ospitál Referénsia Oé-Cusse.
Nia esplika, ai-moruk esensiál 17 ne’e importante hosi hospitál nian iha rua hanesan heparin ho mannitol, tanba mannitol ne’e uza ba pasiente sofre trauma no emejénsia nian.
“Ne’ebé agora daudaun maka laiha, tanba estoke iha SAMES mós laiha, entaun ami mós labele halo buat ida, kuandu iha pasiente ami refere ba nasionál,” nia informa.
Kona-bá oksijéniu iha ospitál estoke sei iha, maibé sei la aguenta to’o fulan, hanesan mós ho ai-moruk operasaun anestesie nian, daudaun ne’e estoke sei iha maibé depende ba pasiente.
Kuandu konsulta barak, posibilidade to’o de’it janeiru nia rohan, entaun ba oin pasiente sei refere ba nasionál ona tanba ai-moruk laiha ona.
Notísia relevante: Estoke ai-moruk iha armazein Hospital Referénsia Oé-Cusse sufisiente
Jornalista: Abílio Elo Nini
Editór: Evaristo Soares Martins
