iklan

HEADLINE, MUNISÍPIU, OÉ-CUSSE (RAEOA), SAÚDE

Profisonál saúde 91 iha Oé-Cusse serbisu voluntária, 44 termina kontratu

Profisonál saúde 91 iha Oé-Cusse serbisu voluntária, 44 termina kontratu

Diretora Servisu Saude Oe-Cusse, Lolita dos Santos. Imajen Tatoli/Abílio Elo Nini.

OÉ-CUSSE, 10 janeiru 2024 (TATOLI) –  Profisionál saúde hamutuk na’in-91 iha Rejiaun Administrativa Espesiál Oé-Cusse Ambeno (RAEOA), kontinua presta servisu ho voluntária hodi hein kontratu foun hosi Ministériu Saúde (MS) no na’in-44 servisu iha saúde família termina ona kontratu iha loron 31 dezembru 2023.

“Sira servisu hanesan bainbain, sira na’in-91 ne’e, iha ajente 17, sira seluk termu sertu, agora sira servisu voluntáriu hodi hein kontratu foun ka hapara, maibé sira saúde família na’in-44 kontratu maka termina tanba momentu ita rekruta uza osan fundu COVID-19,” Diretora Servisu Saúde Oé-Cusse, Lolita dos Santos ba Agência Tatoli, iha Oé-Cusse, kinta ne’e.

Notísia relevante:RAEOA hein karta ofisiál atu hapara profisionál saúde kontratadu

Lolita dos Santos, hateten, antes ne’e servisu saúde rejionál submete ona,  avaliasaun dezempeñu kada funsionáriu ba Ministériu Saúde, hodi avalia no analiza progresu servisu saúde Oé-Cusse nian durante tinan 2023.

“Maibé to’o agora ita seidauk iha karta ofisiál ruma hosi Ministériu Saúde atu renova ka hapara funsionáriu ira-nia kontratu, tanba desizaun hotu iha Ministériu Saúde, maibé sira kontinua hanesan bainbain hodi hein, sira-nia naran ita hato’o ona iha Governu Sentrál liuhosi Ministériu Saúde,” nia informa.

Diretóra ne’e, rekoñese, sentru saúde no postu saúde sira iha terrtóriu Oé-Cusse, enfrenta problema menus rekursu umanu.

Maibé polítika ne’ebé servisu saúde Oé-Cusse halo, hodi aloka funsionáriu permanente balu hodi taka provizória kontratadu sira-nia fatin hodi kontinua fó atendimentu ba komunidade sira.

“Ita-nia postu saúde sira laiha problema atu taka, iha menus profisionál, balu ida de’it no balu na’in-rua, maibé ita koloka permanente sira balu ba haforsa-tán atu taka kontratadu sira-nia fatin, nune’e servisu saúde labele abandona,” nia informa.

Purtantu, totál funsionáriu servisu iha saúde Oé-Cusse hamutuk 350, permanente na’in-156 la, restante kontratadu no koloka iha postu saúde 20 no sentru saúde lima (5) iha territóriu Oé-Cusse.

Notísia relevante:Profisionál Saúde 2.256 kontratu konklui no MS foin rekruta no sei simu 229

Entretantu, antes ne’e Ministra Saúde, Elia dos Reis Amaral, hapara ona profisionál saúde, sira-ne’ebé maka kontratu remata iha loron 31 dezembru 2023 ne’e.

“Ba pesoál saúde sira-ne’ebé mak ninia kontratu remata iha iha 31 dezembru 2023 ne’e tenke hapara, depois kontinua ba rekrutamentu, entaun sira-ne’ebé termina kontratu bele konkore ba vaga ne’ebé maka Ministériu Saúde loke, atu nune’e bele fó atendimentu ba populasaun sira iha ita-nia rain,” Ministra Elia Dos Reis Amaral, afirma.

Dirijente Servisu Saúde Oé-Cusse, informa, kona-bá ai-moruk, iha item tolu maka nia estoke hotu, maibé la afeta ba atendimentu públiku.

“Ai-moruk iha laiha stoke-out, kuandu ita dehan stoke out, kecuali 10% ba leten, ita-nian 1% de’it ne’e, ne’ebé Oé-Cusse laiha problema, bainbain postu saúde sira mak hato’o pedidu mai, agora agora sufisiente hela, só iha item tolu maka hotu, pediátria, pretison 5 miligrama no benan,” nia katak.

 Notísia relevante:La mantein kontratu Profisionál Saúde sei afeta ba vida pasiente

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!