iklan

HEADLINE, SAÚDE

Profisionál Saúde 2.256 kontratu konklui no MS foin rekruta no sei simu 229

Profisionál Saúde 2.256 kontratu konklui no MS foin rekruta no sei simu 229

Diretor Jerál Serbisu Kooperativu, Ministériu Saúde, Marcelo Amaral. Imajen Tatoli/Francisco Sony.

DILI, 08 janeiru 2024 (TATOLI) – Diretór Jerál Servisu Koorporativu iha Ministériu Saúde (MS), Marcelo Amaral, informa profisionál saúde sira ne’ebé kontratu konklui iha 31 dezembru hamutuk 2.256. MS foin rekruta no sei simu uluk profisionál saúde ho totál 229, mak sei fó atendimentu uluk ba pasiente sira iha Hospital Nasional Guidu Valadares.

“Profisionál saúde sira ne’ebé kontratu remata iha 31 dezembru hamutuk 2.256, husi profisionál saúde sira-ne’e Ministériu Saúde kontratu ho orsamentu Covid-19 nian, entaun mai 2023 orsamentu hotu ona signifka katak kontratu remata no la kontinua utiliza iha 2024 nian, ho ida-ne’e afeta ba atendimentu sira, maibé ministériu hahú loke ona rekrutamentu”, Marcelo Amaral hateten iha nia kan’ar fatin MS Caicoli, ohin.

Nia dehan, bainhira instituisaun sira presiza fali profisionál saúde, tenke liuhosi rekrutamentu atu  bele hala’o fila fali servisu.

“Profisionál saúde hirak ne’e uluk ita kontratu ba iha covid-19 no sira hala’o servisu atendimentu iha fasilidade saúde no mós ba servisu saúde na família sira, maibé Ministériu Saúde hahú loke ona vaga sira bele konkore fali”, nia afirma.

Marcelo subilña, tuir dadus husi Ministériu Saúde katak totál profisionál saúde ne’ebé permanente hamutuk 3.559, husi ne’e rejime espesiál hamutuk 3.174 no rejime jerál hamutuk 385.

Iha sorin seluk, Prezidente Komisaun Permanente Rekrutamentu ba kontratadus iha Ministériu Saúde, Julio do Santos, hateten ekipa painel juri halo ona esforsu molok tama fevereiru, MSselebra ona kontratu ho profisionál saúde sira hodi halo atendimentu populasaun sira.

“Ami-nia ekipa painel juri halo ona esforsu, molok tama fevereiru mak profisionál saúde tenke selebra ona kontratu ho Ministériu Saúde atu bele hala’o ona atendimentu ba komunidade sira. Husi aplikante sira ne’e hamutuk 1.102 mak liu iha selesaun dokumentu”, Julio dos Santos hateten.

Nia informa, MS loke vaga ne’e iha 5 dezembru to’o 18 dezembru, aplikante hamutuk besik rihun neen mak konkore. Iha 30 dezembru, hahú halo selesaun dokumentu ba aplikante hamutuk 1.102 mak pasa nune’e sei tama ba selesaun entervista.

“Ita loke vaga iha 5 dezembru to’o 18 dezembru depois aplikante ne’ebé konkore besik rihun neen no ita prepara avalia no ita fó sai rezultadu ikus iha 30 dezembru, aplikante ne’ebé liu selesaun dokumentu hamutuk 1.102  no selesaun entervista iha loron 6 to’o 14 janeiru no sei pasa hamutuk 229 mak sei hala’o uluk servisu atendimentu iha Hospitál Nasionál Guido Valadares (HNGV).

Nia esplika, husi profisionál sira-ne’e sei mai husi médiku, enfermeiru, parteira no tékniku aliadu sira.

“Ita loke rekrutamentu ida-ne’e bazeia ba despaixu husi Minsitra Saúde ne’ebé ho númeru despaxu 22 /novembru atu estabelese komisaun permanente ba rekrutamentu ba kontratu. Entaun husi 22 novembru, komisaun halo preparasaun ba rekrutamentu, iha 5 dezembru ita fó sai  informasaun ba rekrutamentu kontratadu ba nivel Ministériu Saúde ne’ebé sei fahe Hospitál Nasionál Guido Valadares (HNGV).

Nia esplika, vaga ne’ebé loke ne’e seidauk sufisiente hodi atende pasiente sira ho nune’e Ministériu Saúde iha planu sei loke tan vaga iha faze tuir mai atu nune’e bele halao atendimentu iha Servisu Sentrál, Hospitál referál sira, Munisípiu sira hotu no mós servisu ambulánsia nian.

“Númeru sira-ne’e ita seidauk sufisiente, entaun ida-ne’e ba etapa dahuluk ita sei koloka ba HNGV no sei tuir mai ita sei loke tan etapa daruak no datoluk nian hodi responde ba nesesidade populasaun nian. Tanba númeru sira-ne’e tuir ita-nia mapamentu ne’ebé mak ita prepara seidauk to’o, entaun ita loke vaga ida-ne’e depois sira mai kompete, karik se mak liu sei halo kontratu ho Ministériu Saúde atu sai servidór ba pasiente sira iha ita-nia rain”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!