DILI, 11 maiu 2024 (TATOLI)–Ekipa Mushila FC obrigadu tenke sofre golu haat husi nia adversáriu Assa FC, basa falla iha Guarda Rede ne’ebé la antisipa bola ho di’ak iha jogu kontinuasaun kopa Federasaun Futeból Timor-Leste (FFTL), ne’ebé realiza iha Estádiu Munisipál Dili, sábadu lorokraik.
Jogu ne’ebé dirije husi Árbitru, Fernando do Rego da Costa, Juíz liña, António de Carvalho, Gabriel Pereira no Árbitru rezerva, Bernardino Mascarinhas, orienta jogu la’o, ekipa rua lansa kedan kontra no atake ba malu tuir tékniku no abilidade ekipa ida-idak ninia hodi buka hatama golu.
Durante jogu, adeptu sira asiste ho lian maka’as hodi fó ksolok ba ekipa rua ne’ebé hala’o hela jogu iha kampu laran. Assa halo jogu ho modelu ofensivu ka duir bola a’as no ansi hatama golu, enkuantu Mushila mós halo presaun ho tátiku tiki-taka duir bola rai akompaña mós ho bola long, maibé esforsu hirak ne’e tenke hela de’it hanesan esforsu tanba la hatudu rezultadu pozitivu.
Maibé Assa halo esforsu maka’as maibé sempre lakon bola iha liña klaran no avansadu ain-los nian, ho fallansu hirak ne’e fó kedan oportunidade ba jogadór Mushila halo kontra no atake ne’ebé maka’as, sutu barak mak Mushila halo maibé sutu hirak ne’e kontinua hela ho sutu tanba seidauk kona iha alvu.
Notísia relevante : DIT FC ho Relay FC fahe pontu ba malu iha abertura kopa FFTL
Minutu kontinua hakat, jogu kontinua la’o ba oin, Mushila nunka lakon nia vontade nafatin hatudu jogu bonitu, Assa mós lakoi lakon, kontinua esforsu,maibé jogu la’o to’o minutu 34, Jogadór Mushila Jonatas Pereira utiliza oportunidade bola barullu iha liña oin Assa nian hodi les kedan rede Assa, hodi muda rezultadu ba 1-0.
Golu ne’e halo Jogadór Mushila nian selebra ho kontente, balu halai sai mai iha kampu li’ur hodi selebra vitória ne’e maibé sira la sente tempu sei naruk.
Haree ba Assa sofre uluk ona golu iha minutu primeiru ne’e, Treinadór Francisco de Araújo halo mudansa jogu hodi dada sai Jogadór Defeza Adriel Pereira (23) hodi hatama fali jogadór suplente Joel Fernandes (31) iha minutu 35 hodi reforsa fali iha lina klaran. Aleinde ne’e, iha minutu hanesan Treinadór ne’e dada sai mós Jogadór Joanzinho Leong (88) husi liña klaran hodi hatama fali Jogadór Martinho Belo (7) hodi reforsa iha avansadu parte karuk.
Nune’e, joga la’o to’o minutu 41, Mushila haree Assa halo presaun maka’as, Treinadór Emílio da Silva tenta halo mudansa mós ba nia jogadór hodi dada sai Ejivánio da Costa(19), hodi hatama fali Jogadór Mário Embape (11) hodi reforsa fali liña karuk nian.
Jogu la’o ho ritmu ne’ebé maka’as, Assa tenta halo presaun hodi buka empata maibé Mushila la fó fatin to ‘otreinadór nafatin halo mudansa jogu hodi dada sai tan Jogadór Avansadu Junilson Lelo (10) iha minutu 43, nune’e bele hetan fali jogu ho modelu foun, nune’e bele prodús golu.
Haree ba estratejia Assa nian sa’e maka’as, Treinadór Mushila mós lakoi atu lakon oportunidade hodi dada sai nia jogadór na’in-rua Amancio Araujo (18) Defeza no Sandro Quintão (14) hodi hatama fali Jogadór Fretelino dos Santos (10) no Cristovão de Carvalho (29) hodi reforsa fali iha liña defeza.
Maski ekipa rua halo mudansa totál ba jogu maibé forsa ekipa rua kontinua laiha diferente to’o minutu primeira parte termina laiha tan golu ruma mak akontese no vitória provizóriu lidera husi Mushila 1-0.
Hakur ba parte daruak, ekipa rua nafatin lansa kontra no atake ba malu, Assa halo esforsu oin-oin, maibé esforsu hirak ne’e seidauk to’o iha nia finaliade.
Maski seidauk iha mudansa signifikativu, maibé Assa nafatin halo kontra no atake to’o ikus iha minutu 48 jogadór Assa José da Costa (21) konsege responde golu ida bainhira bola kantu nia rasik mak sutu bola direita tama ba rede Mushila nian, hodi muda rezultadu ba 1-1. Golu ne’e halo adeptu Assa nian hakilar ho lian maka’as no jogadór sira halo selebrasaun ba golu ne’e ho kontente.
Husi golu ne’e, halo Mushila nia mentalidade jogu komesa tun no Assa utiliza kedan oportunidade hodi lansa atake ne’ebé maka’as halo Mushila book-an araska.
Husi atake ne’ebé maka’as iha minutu 58, Jogadór Assa José da Costa lansa tan golu ida hodi muda rezultadu ba 2-1, golu ne’e halo kanek tebes Mushila nia laran maibé labele halo buat ida no joga kontinua ho profisionál.
Ho presaun ne’ebé sa’e maka’as husi jogadór Assa nian, iha minutu 61 rezulta Guarda Rede Mushila Carvarinho Fernandes (1) sente ain moras no treinadór deside dada sai nia hodi hatama fali Guarda Rede suplente Egso Caldes (12) hodi substitui.
Ho prezensa Guarda Rede ne’e kontribui kedan derrota boot ba Mushila tanba Guarda Rede ne’e laiha mentaliade ne’ebé forte hodi salva sutu sira ne’ebé jogadór Assa halo.
Joga la’o to’o de’it minutu 65, Jogadór Assa nian Patric Koame (19) lansa bola kabesa ida halo Guarda Rede Egso la antisipa bola tama liu rede laran muda rezultadu ba 3-1. Golu ne’e halo Mushila nia prestasaun jogu tun liután.
Jogu la’o to’o minutu 80, Treinadór Assa haree jogadór Patric (19) la hatudu ona jogu di’ak, nia deside dada sai hodi substitui kedan ho Jogadór Carlos de Carvalho (6) hodi reforsa fali jogu iha lina klaran.
Husi mudansa jogadór ne’e fó duni rezultadu di’ak ba ekipa Assa tanba jogu la’o to’o minutu 86, José da Costa responde tan golu ida hodi halo kompleta rezultadu metin ho 4-1.
Golu ne’ebé José lansa hanesan golu ikus ba ekipa rua tanba jogu la’o husi minutu 88 ba leten to’o minutu 90 no aumenta tan adisionál minutu 5, maibé laiha tan golu ruma mak ekipa rua prodús, nune’e rezultadu hatudu Assa mak rekolla pontu tolu no Mushila hela ho derrota no laiha direitu absoluta ba pontu tolu.
Bainhira jogu termina Asistente treinadór Mushila Van Basten rekoinese fallansu ne’ebé Guarda Rede halo mak fó derrota ba Mushila.
“Los duni falla iha ami-nia Guarda Rede nia la antisipa ho di’ak mak ami sofre golu ne’e. Maibé ba oin ami sei hadia di’ak liután atu hasoru jogu rua ikus, nune’e ami bele avansa ba oitavu finál,” Van, tenik.
Iha sorin seluk, Treinadór Assa, Francisco Araujo hatete, iha parte dahuluk nia ekipa halo jogu ho velosidade tun tanba nia rasik mak hakarak halo nune’e hodi rezerva jogadór di’ak sira tun iha minutu klaran nune’e fó vitoria ba ekipa.
“Ami hala’o jogu iha primeiru ho bola long tanba ami hatene Mushila ekipa ne’ebé forte maioria jogadór selesaun de’it mak joga nakonu iha sira. Ha’u tenke halo estratejia rezerva ha’u-nia jogadór di’ak sira hatun iha minutu klaran halo mudansa jogu ikus ami manán duni,” Fransisco dehan.
Maski hadau ona pontu tolu maibé kontinua prepara ho másimu nune’e bele manán iha jogu rua ikus hodi avansa ba oitavu finál.
Jornalista : Hortêncio Sanchez
Editora : Julia Chatarina
