DILI, 13 maiu 2024 (TATOLI)—Servisu Edukasaun munisípiu Liquiçá submete ona dadus profesór hamutuk 125 tama ona ba idade reformadu, ba Ministériu Edukasaun (ME).
“Ita iha totál profesór reformadu hamutuk 125. Sira seidauk hatama karta rekerimentu ba Ministériu Edukasaun maibé sira hein de’it lei reforma obrigatóriu,” Diretór Servisu Edukasaun munisípiu Liquiçá, Júlio da Silva, informa via telefónika, segunda ne’e.
Profesór hirak ne’e kontinua hela hanorin tanba eskola balun iha Liquiçá menus profesór.
“Daudaun ne’e sira kontinua hanorin hela tanba ema laiha. Sira kuaze ho idade 60 to’o 76. Sira-ne’ebé moras ne’e hamutuk na’in-haat,” nia akresenta.
Notísia relevante : Komisaun A husu Governu aprezenta proposta-lei reforma obrigatóriu ba FP
Iha sorin seluk, Diretór Servisu Edukasaun munisípiu Ainaro, Patrício da Costa, informa, profesór hamutuk 129 tama ona ba idade reformadu.
“Númeru ne’e kompostu husi mane 79 no feto 50, ne’ebé mai husu nível pre-eskolár nain-haat, ensinu báziku na’in-120, no ensinu sekundáriu jerál na’in-lima,” Diretór relata.
Profesór ne’ebé mate ona hamutuk 70, kompostu husi mane 43 no feto 32, enkuantu profesór ne’ebé daudaun moras hela iha 11 (feto tolu no mane ualu).
Nune’e mós, Prezidente Institutu Nasionál Seguransa Sosiál (INSS), Arlindo Pinto, hateten, Konsellu Miinistru aprova ona lei reforma obrigatóriu.
“Lei obrigatóriu ne’e aprova ona iha Konsellu Ministru, agora hein implementa de’it. Profesór reformadu iha territóriu laran hamutuk 2.000-resin,” nia informa.
Jornalista : Osória Marques
Editora : Julia Chatarina
