DILI, 16 maiu 2024 (TATOLI)—Embaixada Malázia iha Timor-Leste oferese ai-han nutritivu ba estudante defisiénsia tilun sira iha eskola AGAPE.
“Ita fó apoiu ai-han ba estudante defisiénsia tilun no iha mós apoiu hanesan mákina saku roupa, foos kilograma 20 saka ualu, manu-tolun, mina, trigu, no subsídiu transporte ba estudante sira hamutuk $300,” Embaixadór Malázia, Amarjit Sarjit Singh, informa hafoin distribui ai-han iha Delta Nova, kinta ne’e.
Embaixadór hein katak kontribuisaun hirak ne’e bele fó kbiit ba sira ne’ebé ho kondisaun defisiénsia.
Estudante defisiénsia tilun, Paulina Mendonça, agradese ba apoiu ne’e hodi hasa’e nutrisaun no saúde di’ak.
Totál estudante ne’ebé ko’alia la hatene no la rona hamutuk na’in-hitu ho nia manorin na’in-tolu.
Notísia relevante : AGAPE fó formasaun lian jestuál ba ema defisiénsia tilun
Sekretaria Estadu Juventude no Desportu (SEJD) по Asosiasaun Defisiente Tilun Timor-Leste (ADTL) iha tinan 2012 ne’e apoia AGAPE lori ema defisiénsia tilun sira hodi tuir kompetisaun iha Koreia no Taiwan.
Pesoál balun husi Singapura iha tinan 2014 apoia ema ho defisiénsia tilun tuir konferénsia mundiál iha Singapura no iha tinan 2016 lori ema defisiénsia tilun tuir konferénsia mundiál iha Filipina.
Sentru Formasaun AGAPE Foundation for Asia Pacific Ministries estabelese iha tinan 2004, ne’ebé funda hosi Wennie O. Fernandez, hodi haree liu ba programa kona-ba edukasaun, fila-liman (negósiu) no desportivu.
“Programa edukasaun sira tenke apreende tanba laiha eskola no bele inklui sira iha eskola públiku maibé laiha tradutór, laiha fasilidade no profesór no profesora laiha kona-ba fila-liman, ho objetivu prepara sira-nia futuru bainhira sira la hetan serbisu iha instituisaun Estadu no ONG. Husi atividade fila-liman ne’e, ha’u prepara sira ba sira-nia futuru atu hamoris sira-nia negósiu rasik,” nia informa.
Totál formandu ema defisiénsia tilun iha AGAPE hamutuk 135, inklui labarik na’in-12
Jornalista : Osória Marques
Editora : Julia Chatarina
