DILI, 03 juñu 2024 (TATOLI)—Portavós antigu profesór kontratadu, Agustinho Pinto, husu Ministériu Edukasaun (ME) atu respeita desizaun Parlamentu Nasionál (PN).
“Husu parte hotu atu respeitu tanba Parlamentu Nasionál mak iha poder boot liu, hanesan poder polítika. Nune’e, rekomenda ba Ministériu Edukasaun atu respeita sira-nia direitu Konstitusionál ne’ebé hatur ona iha KRDTL artigu 50 kona-ba direitu traballu. Nune’e mós, husu ba Ministériu Edukasaun atu iha fuan boot simu rezolusaun Parlamentu, ne’ebé husu atu halo avaliasaun dezempeñu ba profesór kontratadu sira no halo estensaun kontratu ba profesór kontratadu sira,” Agustinho Pinto, hateten via telefónika, segunda ne’e.
Biban ne’e, nia husu mós ME atu respeita lei estatutu funsaun públika ne’ebé regula funsionáriu públiku no ajente administrasaun públiku inklui dekretu-lei sira seluk ne’ebé regula administrasaun públika nia. Bainhira ME la respeitu rezolusaun mak profesór sira sei hahú organiza malu hodi halo manifestasaun pasífiku ba daruak nian.
“Se Ministériu Edukasaun la implementa rezolusaun Parlamentu nian mak ami profesór kontratadu 2023 prontu ona atu halo manifestasaun pasífiku ba segundu faze, maibé ami fiar Ministériu sei iha fuan boot simu desizaun Parlamentu nian hodi hakotu problema polémika profesór kontratadu sira,” nia akresenta.
Notísia relevante : ME konsidera Rezolusaun PN viola dekretu-lei tolu
Agustinho Pinto konsidera deklarasaun husi ME ne’ebé hatete katak rezolusaun Parlamentu kontra lei-tolu ne’e laloos tanba dekretu-lei tolu mós iha artigu balun mak fó dalan atu halo estensaun kontratu.
“Iha dekretu-lei 3 mós iha artigu balun ne’ebé fó dalan atu halo estensaun kontratu ho razaun urjénsia hanesan mensiona iha artigu 79, 82 no 90. Husi dekretu-lei nú. 32, 33 no 34 kona-ba rejime jurídiku sistema nasionál edukasaun ensinu báziku, ensinu sekundáriu no ensinu pre-eskolár, tanba ne’e Ministériu Edukasaun laiha razaun morál no polítika para rejeita rezolusaun husi Parlamentu nia tanba impaktu husi Ministériu Edukasaun nia desizaun hapara profesór kontratadu 2023, ohin loron povu nia oan sira la asesu edukasaun ho di’ak,” nia esplika.
Antigu profesór husu Governu atu aplika rezolusaun ida-ne’e tuir nia natureza ho seriadade no umildade ba interese Nasaun no povu. “Ami fó fiar tomak ba Nai Primeiru-Ministru, Maun Bot Kay Rala Xanana Gusmão sei foti desizaun ruma bazeia ba rezolusaun husi Parlamentu nian”.
Antigu profesór sira sei la tuir teste bolsa kandidatu ba faze daruak nian ne’ebé daudaun ne’e la’o hela tanba iha rezolusaun PN nia ne’e la sita katak antigu profesór kontratadu sira tenke ba tuir teste bolsa kandidatu.
“Iha rezolusaun Parlamentu, iha pontu rua ne’e la sita antigu profesór kontratadu sira tuir teste bolsa kandidatu tanba rezolusaun Parlamentu ne’e klaru ona, nunee nu’udar portavós husu ba maluk profesór kontratadu sira labele partisipa iha bolsa kandidatu profesór ba faze daruak ne’e hodi respeita rezolusaun PN nia nu’udar órgaun reprezentante povu,” nia fó hanoin.
Asesór ME, Filipe Rodrigues, hateten, ministériu nia pozisaun mak husu parte hotu, liu-liu ba aplikante ne’ebé durante ne’e tuir hela bolsa kandidatu profesór iha faze dahuluk, no agora tama segunda faze atu ema hotu-hotu inklui mós antigu profesór kontratadu ka voluntáriu sira atu nafatin mai hola parte iha teste bolsa kandidatu tanba ME nia pozisaun bazeia ba dekretu-lei kona-ba estabelesimentu jurídiku ba ensinu tolu mak Pre-Eskolár, Ensinu Báziku no Ensinu Sekundáriu ho tékniku vokasionál, ne’ebé hahú husi 01 juñu 2023, Governu anteriór nia tempu, ne’ebé bandu ona ME atu halo kontratasaun ba ema atu sai profesór iha eskola sira.
“Dalan úniku ba ema hotu tantu antigu profesór kontratadu, profesór voluntáriu sira, ami konvida atu hola parte iha prosesu konkursu bolsa kandidatu profesór iha segunda faze. Ministériu Edukasaun laiha dalan atu prosesu ba avaliasaun dezempeñu ba antigu profesór kontratadu sira. Ministériu Edukasaun nafatin tuir regra ne’ebé iha,” nia reforsa.
Jornalista : Osória Marques
Editora : Julia Chatarina
