DILI, 04 juñu 2024 (TATOLI) – Diretór Operasaun no Manutensaun Bee no Saneamentu, BTL,E.P, Aleixo do Santos, dehan uma-kain hamutuk rihun 17-resin mak asesu ona bee moos iha kapitál Dili.
“Tuir dadus 2020 mai to’o agora, ita-nia populasaun hamutuk rihun 17-resin mak asesu ona bee moos iha kapital Dili, tanba dadus sira ne’e kada fulan ita verifika nafatin, atu ita hatene ema hira mak asesu bee moos ida-ne’e”, Aleixo do Santos informa ba TATOLI iha nia kna’ar fatin, ohin.
Nia esplika, dalabalun kontadór sira ne’e populasaun sira bele troka hodi monta ilegál maibé ekipa sira kontinua halo monitorizasaun atu hatene ida-ne’e.
“Dalaruma ema balun troka kontadór sira, entaun ita servisu hamtuuk ho JICA hodi halo fali survey ida ne’ebé bele verifika lolos dadus sira ne’e, atu nune’e ita bele hateten katak ita-nia bee, ita bele fornese ba ita-nia kliente sira ne’ebé mak ita iha”, nia informa.
Nia afirma, tuir planu tenke tau kontadór ba populasaun sira iha kapitál Dili hamutuk 68 mil nune’e sira bele asesu hotu bee moos maibé ida-ne’e esforsu hela, atu bele atinje ida-ne’e.
Nia hatutan, populasaun sira ne’ebé mak seidauk selu bee hamutuk 88% iha Kapitál Dili. “Maibé ita planu katak 68 mil kontadór ne’ebé mak atu liga ba ema sira hotu iha futuru mai, maibé daudaun ne’e ita-nia komunidade kuaze Dili laran hotu hotu asesu bee, problema mak seidauk tau metru kontadór, se bainhira ita tau ona metru kontadór mak ema hotu hatene poupa bee ho didiak’’, nia konklui.
Jornalista : Felicidade Ximenes
Editór : Zezito Silva
