DILI, 12 Juñu 2024 (TATOLI)–Diretór Ezekutivu Servisu Unidade Misaun Konbate Stunting (UNMICS), Joel Maria Pereira, hateten atu evita mánutrisaun iha Timor-Leste, UNMICS lansa programa nutrisaun integradu iha suku sia (9) iha munisipiu haat mak hanesan Bobonaro, Dili, Ermera no Rejiaun Administrativu Espesiál Oé-Cusse (RAEOA).
“UNMICS lansa Programa Nutirisaun integrada ne’ebé ita konvida parseiru sira hanesan Governu no parseiru dezenvolvimentu nasionál no ajensia internasionál ONU nian, entaun ita lansa ona iha suku sia iha munisipiu haat mak hanesan Memo iha Bobonaro, Bairo Pite, Kampu Alor no Maloa iha Dili, Matata iha Ermera, Lifau, Kinan, Oe-silo no Baqui iha RAEOA,” Diretór Ezekutivu UNMICS, Joel Maria Pereira, hateten ba Agência Tatoli, iha Palásiu Prezidensial Nicolaui Lobato, Bairru Pite, kuarta ne’e.
UNMICS lahalo intervensaun direta ba programa ne’e, maibé koordena ho parseiru sira hodi implementa tuir ida-idak nia funsaun.
“Parseiru sira fó formasaun kona-ba forma di’ak familia, preparasaun di’ak ba tein no formasaun kona-ba halo agrikultura iha ambiente no parseiru balun fornese ai-han nutritivu ba labarik hanesan Ministériu Saúde,” nia esplika.
Nia relata, labarik mánutrisaun iha aldeia sia-ne’e husi idade inferiór tinan lima (5) hamutuk 847 ne’ebé kompostu husi 205 iha aldeia Matata, 123 iha Dili, 122 iha Memo, 187 iha Lifau, 54 iha Kinat, 102 iha Baqui no 54 iha Oe-silo.
Atu kombate mánutrisaun ne’e, nia dehan, UNIMICS halo kooperasaun servisu ho Ministériu Saúde, Agrikutura no Peska, Edukasaun nune’e mós Mercy Corps, World Vision, Plan International, Scaling Up Nutrition.
Tuir nia, intervensaun ba programa bele hala’o iha munisipiu hotu, tanba nanizmu iha Timor-Leste iha munispiu hotu-ootu liuliu iha munisipiu sira hanesan Ainaru, Aileu, Bobonaro, Covalima, Ermera no RAEOA.
Taxa problema nutrisaun iha nivel Azia no Global, Timor-Leste iha númeru maiór ne’ebé aprezenta desnutrisaun no nanizmu 47%.
Jornalista : Jesuína Xavier
Editór : Cancio Ximenes
