DILI, 05 Jullu 2024 (TATOLI) – Diresaun Nasionál Veterinária, Ministériu Agrikultura, Pekuária, Peska no Floresta (MAPPF) nia programa vasinasaun antirrábika, entre Janeiru no Juñu 2024, iha Bobonaro, Covalima, Dili, Ataúro no Rejiaun Administrativa Espesiál Oé-Cusse Ambeno (RAEOA) atinje ona 80%, ka ekivalente ba 41.610, husi totál asu 50.696.
Diretora Nasionál Veterinária, Joanita Jong, haktuir katak programa vasinasaun atu prevene moras raiva iha munisípiu risku sira ne’e atu labele fó impaktu ba ema nia saúde.
“Programa vasinasaun foin maka hahú fali, tanba antes ne’e ita halo koordenasaun serbisu balun kona-ba cross border ho Governu Indonézia iha NTT [Nusa Tenggara Timur”, Joanita Jong informa ba Tatoli, iha Comoro, ohin.
Dirijente ne’e adianta katak Ataúro iha totál asu ne’ebé rejista hamutuk 1.908 no hetan ona vasinasaun 1.520 ka 72%, Bobonaro rejista asu 9.024 no vasina ona 8.605 ka 77%, Covalima rejista asu 8.464 no vasina ona 6.597 ka 93%.
Iha Dili rejista asu 21.111 no vasina ona 17.554 ka 88% no iha RAEOA rejista asu 10.189 no vasina ona 7.334 ou ekivalente ba 72%.
Husi programa vasinasaun ne’e, Diresaun Veterinária sei kontinua hala’o atividade ne’e, tanba husi Janeiru to’o Juñu asu oan barak maka moris.“Ha’u husu ba komunidade sira ne’ebé hela iha munisípiu haat, inklui Ataúro atu iha fulan tolu nia laran tenke lori sira-nia asu ba halo vasinasaun tanba munisípiu sira ne’e iha asu oan barak maka moris”, nia apela.
Diretora ne’e husu komunidade nia konxiénsia atu labele baruk lori sira-nia animál bá halo vasinasaun hodi prevene moras raiva hodi labele hada’et fali ba ema.
JoanitA Jong realsa katak ai-moruk ba vasinasaun asu ne’e sufisiente tanba iha Juñu nia laran diresaun simu tan ai-moruk hamutuk rihun 50 ne’ebé asegura hela iha laboratóriu Veterinária nian.
Notísia relevante: Vasinasaun antirrábika iha munisípiu rua no RAEOA suspende provizoriamente
Jornalista: Tomé Amado
Editora: Maria Auxiliadora
