DILI, 27 jullu 2024 (TATOLI) –Misionáriu timoroan sira iha Portugal inklui partisipante sira seluk hamutuk na’in-17 husi kongresaun oioin no nasionalidade 19, entre loron 22-26 jullu, tuir kursu Intensivu ba Integrasaun Missionária iha Centro Missionário Allamano, Fátima.
Kursu intensivu ne’e, organizadu husi IMAG (Institutos Missionários de Ad Gentes), oferese oportunidade valiózu ba aprofundamentu no atualizasaun kompeténsia misionária husi partisipante sira.
“Kursu ne’e aborda temas importante sira, inklui formasaun ba modelos culturais. Tópiku ne’e krusial ba misionáriu sira, tanba bele ajuda sira hodi adapta no traballá efetivamente iha kontextu kulturál diferente. Kapasidade ba kompreende no interaja ho modelos culturais diversu ne’ebé fundamentál ba susesu iha misaun,” Pe. Domingos Gudinho de Araújo, haktuir iha Nota informativa ba Agência TATOLI, ohin.
Aspetu importante seluk, tuir saserdote ne’e, hanesan mós formandu ida, mak hanesan dezafiu ba inter-kulturalidade. Formasaun ne’e fó oportunidade ba partisipante sira hodi reflete kona-ba maneira hodi lida ho diversidade kulturál no promove dialógu respeituozu no konstrutivu entre kultura diferente.
Promove mós oinsá atu sai lideransa servidór. Servi ba nia komunidade, ida-ne’e fó perspetiva valiózu kona-ba maneira hodi lidera ho empatia no servisu sa de’it, ne’ebé komunidade fó fiar ba ita.
“Iha mós tema kona-ba Auto-koñesimentu no intelijénsia emosionál, ne’ebé fó atensaun ba partisipante sira hodi dezenvolve konsiénsia maior ba sira aan rasik hodi hadi’a abilidade komunikasaun no empatia iha fatin misaun,” Nai-lulik timoroan ne’e konklui.
Tatoli
