OÉ-CUSSE, 02 agostu 2024 (TATOLI) – Serbisu saúde Rejiaun Administrativa Espsiál Oé-Cusse Ambeno (RAEOA), sesta ne’e hala’o introdús ba xefe suku ualu no profesór sira-NE’EBÉ pertense sub-rejiaun Pante Makasar kona-bá impaktu vásina Human Papiloma Virus (HPV) hodi prevene kankru serviks ba inan feto sira.
Sekretáriu Rejionál ba Asuntu Saúde, Luís de Jesus Neno, hateten, introdusaun ne’e importante ba xefe suku no profesór sira, tanba iha agostu to’o dezembru 2024, serbisu saúde Oé-Cusse sei halo kampaña nasionál, vasina labarik feto idade 12 to’o 14, atu prevene moras kanku serviks, diftéria no tetanus.
“Moras ne’e mosu barak ona, tán ne’e polítika Governu, liuhusi Autoridade RAEOA halo advokasia ne’e iha Pante Makasar atubele identifika ita-nia labarik feto sira husi idade 11 to’o 14, bele hetan vasinasaun kontra moras sira-ne’e, entaun ohin ita introdús uluk molok, faze tuir sei halo kampaña iha suku no eskola sira,” Luís de Jesus Neno, ko’alia iha salaun igreja Padiae, Oé-Cusse.
Notísia relevante: Durante COVID-19, Hospitál Referál RAEOA rejista pasiente kankru susun na’in-tolu
Dirijente saúde Oé-Cusse ne’e, husu ba autoridade lokál, profesór sira serbisu hamutuk liuhusi kooperasaun, nune’e bele rezolve moras ne’e.
“Bainhira hahú kampaña, ita-nia pesoál saúde sira sei ba eskola, tama suku, husu ita hotu koopera, tanba serbisu saúde ne’e atu tulun ita, liuliu ita-nia alin feto no inan feto sira, oinsá bele prevene moras ne’e, ne’ebé imi labele preokupa,” nia fó hanoin
Jestór sub-rejiaun Pante Makasar, Lorenço da Cunha, konsidera kampañia nasionál ne’e importante atu salva inan feto sira husi moras kanku serviks, nune’e nia sei hamutuk ho autoridade lokál atu partilla informasaun ba komunidade sira.
“Pante Makasar suku ualu, ohin balu la mai, ami sei informa tután, atu fahe informasaun ne’e, atu nune’e komunidade sira labele pániku, katak vásina ne’e atu prevene husi moras aat ne’e, ha’u husu mós serbisu edukasaun atu informa ba eskola sira, nune’e mestri sira hatene atu fó aviza ba alunu sira hodi partisipa iha kampaña ne’e,” nia hateten.
Xefe suku Lalisuk, Hermenegildo Lalisuk, promete sei koopera atu kontinua sensibiliza informasaun ne’e ba iha komunidade, oinsá bele prevene moras kanku serviks.
“Nu’udar autoridade lokál ami apresia, maibé bainhira husi serbisu saúde sira atu tama iha suku, presiza informa ami, atu akompaña, tanba ami orsida sei fahe informasaun ne’e, entaun mai karik presiza konsidera hodi ita la’o hamutuk,” nia rekomenda.
Notísia relevante:2014-2023: Fundasaun Alola rejista kankru susun no serviks hamutuk 245
Entretantu, tuir dadus, serbisu saúde Oé-Cusse, rejista eskola 37, mak alvu vasina Human Papiloma Virus , komposta husi sentru saúde Kiomaonteko rejista eskola 19 no sentru saúde Baqui rejista eskola 18.
Tuir kaléndariu, kampaña vasina Human Papiloma Virus ne’e, sei hahú iha fulan-agostu to’o dezembru 2024, faze dahuluk vasina ba labarik feto idade 11 no 14, faze daruak vasina ba idade 12 no 13.
Jornalista: Abílio Elo Nini
Editora: Evaristo Soares Martins
