iklan

Uncategorized

2014-2023: Fundasaun Alola rejista kankru susun no serviks hamutuk 245

2014-2023: Fundasaun Alola rejista kankru susun no serviks hamutuk 245

Diretóra-Ezekutiva Fundasaun Alola, Maria Imaculada Guterres. Imajen Tatoli/ Egas Cristovão

DILI, 01 fevereiru 2024 (TATOLI)–Diretora Fundasaun Alola, Maria Guterres, hateten hosi 2014 to’o 2023 ne’e, Fundasaun Alola liuhosi programa Ha’u Hili Kura (HALIKU) rejista moras kankru susun no serviks hamutuk 245.

Notísia Relevante: Fundasaun Alola husu inan feton halo detesaun sedu kankru susun

“Kankru susun hamutuk 218 ne’e, iha pasiente 18 mak pozitivu kankru susun no na’in-neen (6) mak mate, tanba ho kondisaun avansadu. Hosi númeru sira-ne’e balun hetan tumor Benignu no kista no kankru serviks iha na’in-25, no pasiente na’in-rua (2) mak mate,” Diretora ne’e hateten ba Agência Tatoli iha nia kna’ar fatin, Mascarinhas, kinta ne’e.

Hosi númeru pasiente sira-ne’e, nia hateten, Fundasaun Alola akompaña pasiente mane ho kankru susun mane.

Tanba ne’e, nia sujere ba Governu atu hadi’a fasilidade saúde no prepara rekursu umanu kualifikadu hodi bele halo atendimente ba pasiente sira iha Timor-Leste, no transferénsia pasiente ba rai-li’ur sei kontinua gasta orsamentu boot.

Nia parte hato’o agradesimentu ba Governu, tanba bele harii ona sentru ba onkolojia, maibé presiza aloka orsamentu adekuadu hodi bele halo tratamentu iha rai-laran.

“Ita nafatin halo ita-nia advokasia ba iha Parlamentu Nasionál oinsá atu fó sira-nia advokasia ba asuntu kankru relasiona ho orsamentu. Tanba, barak liu, kankru númeru ne’ebé forte no refere ba iha rai-liur,” nia dehan.

Nia konsidera, Governu prevee orsamentu ba iha asuntu kankru ne’e kiik loos, entaun ne’e sai dezafiu ida ba tratamentu.

Fundasaun Alola disponibiliza apoiu ema-ne’ebé presiza halo diagnosa sedu

Diretora ne’e, iha kompromisu hodi bele sensibiliza komuidade iha munisipiu hotu kona-ba moras kankru susun no kankru serviks ne’e.

“Ami iha programa barak hanesan direitu feto. Iha eventu boot aihan mundial ne’ebe ami halo disukusaun ho komunidade iha munusipiu sira hotu, ne’ebé integra programa saúde hodi sensibiliza populasaun,” nia hateten.

Nia husu ba poopulasaun hodi bele fó asisatensia ba sira-ne’ebé hakarak hetan ajuda liuhosi númeru kontatu 7833 5656 hodi bele hetan asisténsia atu lori ba diagnostika iha ospitál.

“Se sira hetan moras mak la’o araska no laiha transporte, ami-nia karreta bele ba foti. Ami bele lori diretamente sira ba iha ospital. Ami akompña sira to’o mediku sira simu atu halo diagnose,” nia dehan.

Fundasaun Alola bele fó insentivu ba han no transporte, ba pasiente sira-ne’ebé hosi munisipiu atu halo tratamentu iha ospital durante sira-nia estadia iha Dili.

Iha ne’e, Fundasaun Alola mós oferese susun-falsu ka fuuk-falsu ba pasiente sira hodi bele uza depois de cirurjia.

Nia husu ba ema hotu atu kontrola nia aan bainhira sente sintoma ruma iha isin-lolon hanesan kafuak ruma, tenke aproxima aan ba fasilidade saúde ne’ebé besik hodi bele halo diagnostika sedu.

Jornalista : Jesuína Xavier

Editor        : Cancio Ximenes

iklan
iklan

Leave a Reply

iklan
error: Content is protected !!