Dadus VBJ ALFeLa: Dili-Baukau númeru aas, Manatutu ki’ik
DILI, 14 Outubru 2026 (TATOLI) – Asisténsia Legál Feto no Labarik (ALFeLa) rejista kazu Violénsia Bazeia Ba Jéneru (VBJ) hamutuk 263 durante períodu Janeiru to’o Juñu 2026, hodi fó asisténsia legál ba vítima sira atu asesu ba justisa liuhusi prosesu tribunál.
Diretora Ezekutiva ALFeLa, Marcelina M. F. Amaral, hateten katak vítima sira ne’e mai husi munisípiu 13 iha Timor-Leste, inklui Rejiaun Administrativa Espesiál Oekusi-Ambeno (RAEOA).
Nia esplika katak ALFeLa fó apoiu legál no advokasia ba vítima sira, hodi garante katak sira bele akompaña sira-nia kazu iha tribunál no buka hetan justisa.
“Vítima violénsia bazeia ba jéneru sira-nia kazu dala barak komplikadu. Balun mak kazu violénsia doméstika, insestu no violasaun seksuál. Tanba ne’e, vítima hamutuk 263 ne’ebé ita rejista durante períodu ne’e, ita fó asisténsia legál ba sira-nia kazu iha tribunál atu sira bele hetan justisa ne’ebé justu,” Diretora Marcelina hateten ba TATOLI iha ALFeLa nia edifísiu, Villaverde, Dili, kuarta ne’e .
Notísia relevante:Pilár tolu kontribui ba atinjimentu Planu Asaun Nasionál Violénsia Bazeia ba Jéneru
Dirijente ne’e aumenta katak kazu sira ne’e sei iha prosesu iha tribunál, no to’o agora iha suspeitu balun ne’ebé seidauk hetan pena, tanba prosesu judisiál sira sei la’o hela.
Tuir dadus ALFeLa, husi totál kliente foun 263 ne’ebé rejista durante fulan-Janeiru to’o Juñu 2026, kliente hotu-hotu mak feto, inklui labarik feto 51 no feto adultu 212.
Dadus ne’e hatudu katak iha fulan-Janeiru rejista kliente foun 38, Fevereiru 33, Marsu 41, Abríl 55, Maiu 43 no Juñu 53.
Husi perspetiva jeográfika, Munisípiu Dili rejista númeru aas liu, ho kliente feto 87, tuirmai Baukau ho 40, Likisá ho 23 no Aileu ho 22. Enkuantu Manatuto rejista númeru ki’ik liu, ho kliente feto na’in-lima.
Iha parte idade, dadus ne’e hatudu katak maioria kliente sira mak feto adultu ho idade tinan 18 ba leten, hamutuk 194. Enkuantu labarik ho idade tinan-11 to’o 15 rejista 34, idade tinan-16 to’o 17 rejista 17, idade tinan -ima to’o 10 rejista 11, no labarik ho idade tinan zero to’o haat rejista na’in-neen.
Iha edukasaun, kliente na’in-110 mak kompleta ka tuir hela ensinu sekundáriu, na’in-55 iha pré-sekundária, na’in-42 iha ensinu primáriu, na’in-28 la eskola no na’in-28 iha edukasaun universitária, koléjiu ka vokasionál.
ALFeLa kontinua fó asisténsia legál no advokasia ba vítima violénsia bazeia ba jéneru hodi apoia sira iha prosesu judisiál no buka garante asesu ba justisa.
Notísia relevante:Pilár tolu kontribui ba atinjimentu Planu Asaun Nasionál Violénsia Bazeia ba Jéneru
Jornalista : Camilio de Sousa
Editór : Rafael A. Ximenes Belo
