DILI, 13 agostu 2024 (TATOLI)–Ekipa konjunta Sekretáriu Estadu Asuntu Toponímia no Organizasaun Urbana (SEATOU) hala’o despeju administrativu ba uma kain 11 iha Tasi-Tolu, iha postu administrativu Dom Aleixo, munisípiu Dili.
Notísia Relevante: Uma-kain 424 iha Tasi-Tolu mak hetan despeju administrativu iha fulan ne’e
Sekretariu Estadu Asuntu Toponímia no Organizasaun Urbana (SEATOU), Germano Santa Brites Dias, hateten populasaun koopera di’ak ho Governu, tanba ne’e mak sira ba halo despeju administrativu hodi prepara fatin ba simu amu Papa Francisco.
“Fatin presiza hadi’a, tanba vizita amu Papa nian ne’e aproveita hodi hadi’a mós ai-riin bandeira nian ne’e,” Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hateten ba jornalista sira, iha Tasi-Tolu, tersa ne’e.
Despeju administrativu ne’e hahú iha tinan kotuk atu hadi’a sidade Dili ne’e seguru no mós ba ema hotu, tanba ne’e hodi amu Papa nia vizita ne’e hakarak hadi’a duni fatin ne’e, ba misa solene ne’ebé prezide husi Papa Francisco iha 10 setembru 2024, iha tuku 16h30 lorokraiks
Nia esplika, Governu liuhosi Ministériu Obra Públika no Ajensia Dezenvolvimentu Nasionál ADN, fó konpensasaun ba sira entaun sira tenke koopera hamamuk fatin ne’e.
Husu kona-ba okupante Tasi-Tasi balun ne’ebé seidauk simu osan husi Governu, governante ne’e hateten, kona-ba orsamentu ne’e Ministériu Finansa prosesa hela.
Rezidente Domingos dos Reis hateten, Governu fó sira akordu rekompensasaun ba sira molok ba halo despeju administrativu ba sira.
“Ami asina iha sesta-feira kotuk ne’e hodi hetan rekompensasaun. Ha’u hetan $7.000,” Domingos dos Reis hateten ba jornalista sira.
Nia dehan, populasaun sira sei hein hela transferénsia osan, tanba to’o ohin Governu ba halo despeju administrativu, sira seidauk hetan osan iha sira-nia konta bankaria.
Aleinde ne’e, okupante sira iha Tasi-Tolu uma kain hamutuk 424 mak sei hetan despeju administrativu iha área Tasi-Tolu.
Notísia Relevante: Opozisaun husu Governu fó indemnizasaun ba vítima despeju administrativu
Jornalista : Jesuína Xavier
Editór : Cancio Ximenes
