DILI, 16 jullu 2024 (TATOLI)—Deputadu opozisaun FRETILIN no KHUNTO iha Parlamentu Nasionál (PN), kontinua husu Governu atu aselera prosesu hodi fó indemnizasaun ba vítima despezu administrativu.
Notísia Relevante: Uma-kain 424 iha Tasi-Tolu mak hetan despeju administrativu iha fulan ne’e
Deputadu FRETILIN, Antonio Calau, fó apoiu tomak ba serbisu Sekretáriu Estadu Asuntu Toponímia Organizasaun Urbana (SEATOU) oinsá atu organiza ita-nia sidade Dili, maibé presiza tratamentu dignu ba sidadaun sira.
“Ha’u hakarak konfirma ba ita-nia maluk vítima sira, depois halo eviksaun ba sira, foti sira-nia konta bankária no sira sei hetan indemnizasaun. Ha’u halo konfirmasaun horisehik ba iha Bidau Santana, Bidau Sengol, Metiaut, sira-nia konta bankária ida-ne’e to’o oras ne’e osan seidauk tama,” nia levanta liuhusi reuniaun plenária, tersa ne’e.
Okupante sira sai vítima tiha ona, nia dehan, bainhira loos mak sira hetan indemnizasaun uitoan no pelumenus Governu konsidera no dignifika sidadaun sira-ne’e, atu nune’e sira bele sente katak sira moris iha sira-nia nasaun rasik.
Aleinde ne’e, despeju administrativu ba komunidade iha Tasi-Tolu hanesan mós ho planu Governu nian ne’ebé foti ona sira-nia konta bankária, maibé sira simu ona notifikasaun iha tempu besik no sei hasai família uma kain 424.
“Sira-nia pedidu rua (2) de’it mak husu Governu atu halo indemnizasaun uluk depois mak hasai sira, se bele labele akontese iha tempu badak, tanba sira-nia oan sira hasoru hela prosesu ezame segundu períodu iha eskola. Husu Governu tau iha konsiderasaun,” nia dehan
Deputadu KHUNTO, António Verdiál de Sousa, mós apoiu polítika Governu nian hodi hasai sidadaun sira hela iha espasu públiku maibé kontinua husu atu fó tratamentu ho dignu no umanidade, nune’e labele halo povu ne’e tanis.
Vise Ministru ba asuntu Parlamentár, Adérito Hugo da Costa, hateten Ministériu Administrasaun Estatál (MAE) liuhusi SEATOU ba Governu da-sia nian, ba polítika intervensaun normaliza espasu públiku sira sei la’o nafatin.
Ida-ne’e, nia dehan, la’ós de’it konsentra iha Dili maibé SEATOU tama to’o nível munisípiu hodi alerta ba komunidade labele uza espasu públiku sira-ne’ebé la’ós apropriadu atu sai fatin ba faan sasán, inklui merkadu sira, tanba Governu hakarak tau ona orden to’o nível baze.
Komunidade afetadu sira iha Aitarak Laran ne’e iha kompensasaun no agora prosesu ne’e karik seidauk implementa, tanba nia-parte sei adianta ba membru Governu iha área tutela atu haree oinsá kompensasaun ka indemnizasaun ba komunidade.
“Ba sira-ne’ebé iha Bidau Santana, eis Pasar Sengol Bidau ho sira seluk tan, inklui iha Tasi-Tolu mós envolve entidade relevante halo levantamentu hodi haree kondisaun sira-ne’e. Sira fahe ba grupu tolu hodi halo levantamentu kada uma ba uma hodi haree kondisaun atuál, nune’e posibilidade prepaparativu sira atu bele hetan netik apoiu ruma tuir kbiit ne’ebé ministériu relevante iha, atu fó ba komunidade bainhira hetan despezu administrativu,” nia dehan.
Notísia Relevante: KM analiza no avalia atividade despeju administrativu iha Dili
Jornalista : Nelson de Sousa
Editór : Cancio Ximenes
