DILI, 29 agostu 2024 (TATOLI)–Diretór Ezekutivu Organizasaun Naun Govrnamentál, La’o Hamutuk, Celestino Gusmão, hateten loron konsulta populár 30agostu 1999 mak loron ne’ebé povu Timor-Leste deside nia autodeterminasaun ba ukun rasik aan iha tinan 1999.
“Loron konsulta popular ne’e reprezenta luta naruk no korajen ba luta ba determinasaun povu Timor nian ba futuru mak ukun rasik aan,” Diretór Ezekutivu Organizasaun Naun Govrnamentál, La’o Hamutuk ne’e hateten ba Agência TATOLI, iha Colmera, kinta ne’e.
Ema hotu hatene, Indonézia nasaun ida-ne’ebé boot tebe-tebes iha Nasaun Sudeste Aziatiku, maibé timoroan konsege luta hasoru hodi hetan nia independénsia.
“Timor-Leste iha populasaun ida-ne’ebé kiik ho líder ne’ebé boot, ne’ebé iha korajen luta liuhusi dalan klandestina no gerillia forsa armada sira hodi reziste no luta iha ai-laran,” nia dehan.
Diretór ne’e konsidera iha timoroan sira-nia luta ne’e hatudu diresaun no fó esperansa, korajen no define dalan oinsá atu hetan ukun rasik aan.
“Iha momentu defísil ne’e iha korajen timoroan sira-nian, oinsá mak bele hetan ukun rasik aan. Entaun, foinsa’e sira tenke kontinua ida-ne’e luta ba dezenvolvimentu nasionál, luta ba ita-nia aan atu bele sai husi mukit no ki’ak”, nia sujere ba foinsa’e sira.
Nia hateten se foinsa’e sira hetan oportunidade ba servisu iha rai liur, fila mai kontribui dezenvolvimentu nia rai doben Timor-Leste.
Diretór mós apela ba estudante sira-ne’ebé kontinua estudano hala’o estudu iha universidade sira hodi aprende didi’ak siénsia atu bele hadi’a futuru nasaun nian.
“Estudante tenke estuda didi’ak no aplika siénsia ne’ebé sira hetan hodi dezenvolve ita-nia rain no mídia sira mós kontinua promove ita-nia situasaun no kondisaun reál ba iha públiku sai aspirasaun povu no governante sira-nian,” nia hateten.
Jornalista : Jesuína Xavier
Editór : Cancio Ximenes
