DILI, 14 Jullu 2026 (TATOLI)-Vise-Ministru ba Asuntu Parlamentár, Adérito Hugo da Costa, husu ba Ajénsia Notisioza Timor-Leste Tatoli, I.P, atu adapta ba teknolojia informasaun ne’ebé avansada no tenke rapides iha publikasaun informasaun sira.
Mensajen ida-ne’e nia hato’o iha ámbitu selebrasaun aniversáriu Tatoli ba da-X, ne’ebé marka tinan sanulu nia ezisténsia hahú husi 27 Jullu 2016 to’o 27 Jullu 2026.
“Hanesan Ajénsia Estadu ninian, ha’u husu imi tenke lais liu duké mídia sira seluk, tanba imi Estadu mak investe. Entaun, kondisaun no fasilidae hothotu ne’ebé iha, imi iha tempu sufisiente atu dezenvolve di’ak liután duké mídia sira seluk”, Adérito Hugo hateten ohin.
Nia dehan Tatoli hanesan Ajénsia Notisioza Ofisiál Estadu ninian iha esperansa nafatin atu adpta ba teknolojia ho informasaun ne’ebé atuá, nune’e informasaun ne’ebé liuhusi kanál Tatoli nian, bele halo balansu ba informasaun iha plataforma mídia sira seluk ne’ebé dalaruma hasai informasaun sira ne’ebé la’ós detalla.
“Ami-nia esperansa mak konta ho rekursu ne’ebé imi iha, ha’u espera katak imi iha responsabilidade profisionál ba imi-nia karreira nomós iha responsabilidade hanesan timoroan ajuda ita-nia liberdade imprensa ho profisionál, nune’e haburas ita-nia demokrasia no Estadu direitu demokrátiku ne’ebé ita dezenvolve tinan 24 hanesan Estadu soberanu”, nia hato’o
Tuir nia, papél jornalista nian, liuliu Tatoli importante tebes ba iha prosesu dezenvolvimentu país ninian.
Notísia relevante: MTK no MJ husu Tatoli nafatin hatudu profisionalizmu iha publikasaun notísia sira
Jornalista: Arminda Fonseca
Editora: Maria Auxiliadora
