DILI, 11 Setembru 2024 (TATOLI) – Ekipa Servisu Nasionál Ambulánsia no Emerjénsia Médika, Institutu Públiku (SNAEM, I.P), dezmonta ona postu saúde temporáriu hamutuk 21 iha Tasi-Tolu, hafoin fó asisténsia médika ba sarani sira durante misa iha fatin ne’e.
“Servisu saúde husi Sentru Ambulánsia Nasionál, ohin, komesa dezmonta ona sasán sira hanesan postu saúde, ne’ebé monta iha Tasi-Tolu hamutuk 21. Ita monta hodi apoia ba vizita Papa Francisco iha Timor-Leste durante iha misa solene”, Diretór Nasionál Operasaun SNAEM, I.P, Amelito Xavier Maria Gomes, dehan ba Tatoli.
Nia informa katak atividade ne’e serbisu konjuntu tanba envolve mós Ministériu Saúde, Krús Vermella Timor-Leste (CVTL), Bombeiro, PNTL no F-FDTL no klínika privada sira mak hanesan Dili Medicál Center (DMC), Ordem de Malta no klínika Fatumeta.
“Ekipa sira-ne’e mak durante ne’e ami kolabora hodi halo serbisu no fó atendimentu primeiru sokorru iha Tasi-Tolu, komesa husi 9 to’o 10 Setembru horisehik”, salienta.
Diretór operasaun ne’e seidauk relata kona-ba dadus finál durante fó asisténsia médika, tanba ekipa sei rekolla hamutuk mak foin fó sai ba públiku ho nia kauza sira.
“Dadus pasiente iha, maibé ekipa saúde husi servisu ambulánsia seidauk bele relata, tanba horikalan ami fila tuku 12h00. Tan ne’e, ami seidauk iha totál hamutuk hira, ne’ebé iha lorontuirmai sei informa ba públiku kona-ba peregrinu hira mak hetan asisténsia husi pesoál saúde sira no tanba saida mak hetan moras ka dezmaia ou moras seluk”, nia adianta.
Notísia relevante: Ospitál temporáriu iha Tasi-Tolu trata sarani hamutuk 31 tanba monu
Jornalista: Abílio Elo Nini
Editora: Maria Auxiliadora
