OÉ-CUSSE, 16 Setembru 2024 (TATOLI) – Institutu Nasionál Seguransa Sosiál (INSS), hahú ohin halo pagamentu faze datoluk ba pensaun sosiál no ba ema ho defisiénsia hamutuk 466 iha suku Naimeko, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Koordenadór Institutu Nasionál Seguransa Sosiál (INSS) Oé-Cusse, Teotónio Tolan, hateten pagamentu ba idozu tinan entre 60 no 69 simu $60 kada fulan, idade 70 to’o 79 simu $80 no idade 80 ba leten simu 100.
“Ohin, loron primeiru pagamentu pensaun sosiál faze datoluk husi Jullu, Agostu no Setembru. Iha Oé-Cusse ita hahú uluk husi suku Naimeko, Pante Makasar”, Teotónio Tolan dehan ba Tatoli, ohin.
Notísia relevante: MSSI koordena asuntu tolu inklui pensaun sosiál ho Autoridade RAEOA
Koordenadór INSS ne’e informa katak tuir lista editál husi nasionál manda ba RAEOA, rejista benefisiáriu 7.635, maibé sei iha tan dadus foun balun ne’ebé seidauk junta, maibé tuir dadús tuan, iha faze dahuluk to’o daruak iha ema 7.600.
“Ida-ne’e orsida sei aumenta tan ba sira foun ne’e, maibé agora ami seidauk hatene loos, tanba ohin urjénsia no ami sei loke sistema para ajusta loloos”, katak.
Ba pagamentu ne’e, parte INSS serbisu hamutuk ho BNCTL no konsentra de’it iha sede suku idak-idak no ba sira-ne’ebé la’o labele sei koordena hamutuk hodi halo pagamentu movel to’o sira-nia hela fatin.
“Prosesu pagamentu ho maneira rua. Primeiru, halo pagamentu movel ba benefisiáriu ne’ebé la’o labele no pagamentu seluk konsentra iha sede suku idak-idak. Ohin ne’e hahú iha Naimeko no pagamentu movel ho karreta no motór ohin mós la’o no sira foun mós ohin foti konta bankária iha ne’e no halo kedan pagamentu. Karik laiha fatin, ami sei buka fali tempu seluk”, dehan.
Notísia relevante: Governu define valór mínimu pensaun invalidez no ferik-katuas
Totál benefisiáriu pensaun sosiál iha Oé-Cusse hamutuk 7.600, husi númeru ne’e sub-rejiaun Pante Makasar hamutuk 3.525.
Kaléndariu pagamentu hahú iha loron 16 Setembru 2024 iha suku Naimeko ba benefisiáriu 466, iha loron 17 realiza iha suku Bobokase ba benefisiáriu 209. Iha loron 18 no 19 Setembru, pagamentu iha suku Cunha ba benefisiáriu 574 no iha loron 20 iha suku Lalisuk ba benefisiáriu 285.
Iha 23 no 24 Setembru, pagamentu iha suku Taiboko ba benefisiáriu 725, iha 25 Setembru iha suku Lifau ba benefisiáriu 27. Iha loron 26 no 27 Setembru, pagamentu iha suku Costa ba benefisiáriu 830, iha loron 30 Setembru iha suku Nípani ba benefisiáriu 166.
Faze tuirmai pagamentu iha sub-rejiaun ba benefisiáriu hamutuk 1.704, ne’ebé iha loron 01 to’o 04 Outubru hahú iha suku Bobometo ba benefisiáriu 1.035, suku Usitasa’e 528 no suku Usitaqueno 141. Pagamentu tuirmai iha sub-rejiaun Pássabe iha loron 07-10 Outubru ba benfisiáriu hamutuk 911.
Pagamentu ikus nian iha sub-rejiaun Nítibe ba benefisiáriu 1.460, ne’ebé hahú iha loron 11 no 16 Outubru iha suku Suni-Ufe 189, Bene-Ufe 267, Usitaco 353, Lela-Ufe 402 no suku Ban-Afi 249.
Notisia relevante: Deputada PD sujere MSSI hadi’a mekanizmu pagamentu ba idózu sira
Tuir observasaun jornalista iha terrenu, pagamentu ne’e hetan akompañamentu husi autoridade lokál suku Naimeko no Polísia Nasionál Timor-Leste (PNTL).
Jornalista: Abílio Elo Nini
Editora: Maria Auxiliadora
