ATAÚRO, 14 juñu 2019 (TATOLI)—Koordenadór Apoia Sosiedade Sivíl-Gabinete Primeiru-Ministru, Filipe da Costa, inaugura Igreja Evanjélika de Deus Carmelo iha Aldeia IV Adara, Suku Beloi, Postu Administrativu Ataúro, sesta (14/6).
Igreja refere reabilita iha tinan 2017, hetan apoia orsamentu hosi Gabinete Primeiru-Ministru Asuntu Sosiedade Sivíl ho montante orsamentu $80.000,00 itál, fundu kontribuisaun hosi sarani protestante hamutuk $10.466,50 no totál orsamentu ba konstrusaun hamutuk $94.056.75.
Razaun harii Templu (Uma-Kreda) foun ne’e, Prezidente Asembleia de Deus, Pastór Francisco dos Reis esplika, tanba Templu tuan hetan estragu kauza dezastre rai nakdoko no fó ameasa ba sarani sira bainhira hala’o kultu (reza).
Pastór Francisco hateten nu’udar fiar na’in fó obrigadu ba Nai Maromak tanba hatudu dalan ba nai-ulun sira konstrui Igreja Carmelo.
“Uluk señor Taur Matan Ruak sei Prezidente Repúblika, haruka mensajen ba primeiru-ministru kona-ba kondisaun igreja ida ne’e no governu mós apoia osan konstrui igreja ne’e,” nia haktuir.
Prezidente Asembleia de Deus ne’e agradese mós ba sarani Katólika ne’ebé kontribui osan atus lima resin ba konstrusaun igreja foun ne’e. “Igreja nia papél maka haklaken evanjellu, lori ema hotu hakbesik ba Nai Maromak hodi transforma ema-nia moris sai nova kriatura, ema hanesan Bibi Timur sai Bibi Malae maus,” Francisco informa.
Iha biban ne’e, Koordenadór Apoia Sosiedade Sivíl-Gabinete Primeiru-Ministru, Filipe da Costa, kontente ho inaugurasaun ne’e tanba hetan partisipasaun másimu hosi sarani sira.
“Governu hakarak mantein apoiu ba organizasaun sosiedade sivíl no organizasaun relijioza sira hamutuk tulun governu ida ne’e, buka solusaun ba problema nasionál, tanba Timor ne’e tenke moris di’ak, maibé atu moris di’ak presiza hotu-hotu nia apoia,” katak nia.
Nia afirma, governu husu implementasaun projetu ka obra tenke ho responsabilidade no tenke hatudu kualidade di’ak.
Iha inaugurasaun ne’e hetan partisipasaun másimu hosi sarani Protestante sira, Amu Parókia Igreja Katólika Ataúro, Júlio do Carmo, Administradór Postu Administrativu Ataúro, Mateus Belo, Vise Prezidente Asembleia de Deus, Adão Baptista Gomes no Vise Konsellu Asembleia de Deus, Apolinário Martins, Xefe Suku sira iha Ataúro no sarani Katólika balun.
Jornalista: Evaristo Soares Martins
Editór: Xisto Freitas
