DILI, 02 outubru 2024 (TATOLI)—Governu liuhusi reuniaun ordinária Konsellu Ministru (KM), kuarta ne’e, aprova projetu proposta rezolusaun Parlamentu Nasionál, relasiona ho akordu izensaun obrigasaun vistu ho nasaun tolu.
“Konsellu Ministru aprova mós projetu proposta rezolusaun Parlamentu Nasionál nian, relasiona ho akordu izensaun obrigasaun vistu ba titulár pasaporte diplomátiku no ofisiál ka servisu nian entre Governu Repúblika Demokrátika Timor-Leste no Governu Repúblika Filipina, Repúblika Vietname no Repúblika Índia,” referidu nota ne’ebé Agência Tatoli asesu, hafoin reuniaun ezekutivu, iha Palásiu Governu.
Aleinde ne’e, ezekutivu sira aprova mós projetu proposta rezolusaun Parlamentu Nasionál nian kona-ba akordu Servisu Aéreu entre Governu Repúblika Demokrátika Timor-Leste no Repúblika Malázia.
Akordu ne’e ho objetivu atu hametin relasaun bilaterál no promove dezenvolvimentu setór transporte aéreu, ne’ebé nu’udar elementu fundamentál ba inter-konektividade nasaun nian, kreximentu ekonómiku no turizmu.
Notísia relevante : PN ratifika akordu entre TL-Brunei Darusalam izensaun vistu pasaporte diplomátiku
Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, halo aprezentasaun ba Konsellu Ministru kona-ba preparasaun ba realizasaun Festivál Rabilau.
Eventu ida-ne’e, ne’ebé sei akontese husi loron 16 to’o 19 outubru 2024, nu’udar rezultadu husi kolaborasaun entre Prezidénsia Repúblika ho IX Governu Konstitusionál, ho objetivu atu promove turizmu, kultura no desportu iha Timor-Leste. Festivál ne’e sei destaka patrimóniu kulturál no tradisaun lokál sira, liuhusi kompetisaun múzika, dansa, arte dijitál sira, atividade desportiva sira, no feira gastronomia no produtu lokál sira, ho envolvimentu husi Prezidénsia Repúblika, instituisaun governamentál oin-oin no entidade parseiru sira seluk.
Jornalista : Osória Marques
Editora : Julia Chatarina
