DILI, 23 outubru 2024 (TATOLI) – Diretora Jerál Asuntu ASEAN, Elisa da Silva no Pontu Fokál ba Feto, Pás, no Seguransa, reprezenta Timor-Leste iha Enkontru Nível Kapitál ba dala-neen ho títulu “Reklama Feto, Pás, no Seguransa iha Nova Iorke durante loron rua hahú 21-22 fulan-outubru.
Enkontru nívél aas ne’e, realiza iha sede Organizasaun Nasaun Unida (ONU).
“Enkontru ne’e halibur pontu fokál Feto, Pás, no Seguransa (WPS), ema sira ne’ebé halo polítika, no peritu sira husi mundu tomak hodi avalia progresu ajenda WPS nian no identifika solusaun sira hodi rezolve dezafiu sira ne’ebé la’o hela iha esforsu dame no seguransa globál,” tenik iha nota ne’ebé Agência TATOLI asesu husi media Ministériu Negósiu Estranjeiru no Kooperasaun (MNEK), ohin.
Durante enkontru, partisipante sira diskute asuntu oioin relasiona ho implementasaun Planu Asaun Nasionál (PAN), preokupasaun sira ne’ebé mosu iha rejiaun sira ne’ebé afetadu hosi konflitu, no estratéjia sira atu ultrapasa obstákulu sira hodi sustenta ajenda WPS nian, partikularmente hasoru limitasaun rekursu sira.
Eventu ne’e iha diskursu prinsipál sira, diskusaun painél sira, no sesaun sira, promove diálogu kolaborativu ida ne’ebé ho objetivu atu forma futuru inisiativa sira WPS nian iha nivel mundiál.
Enkontru ne’e ko-prezide hosi Estadu Unidu, Roménia, Suisa, no Áfrika-Súl. Enkontru tuirmai sei hala’o iha Japaun iha fulan-fevereiru 2025 no sei ko-prezide hosi Japaun no Noruega.
Jornalista: Hortencio Sanchez
Editór: Rafael Ximenes de A. Belo
