DILI, 06 novembru 2024 (TATOLI) – Primeiru-Ministru Xanana Gusmão garante sei solusiona problema Naktuka.
“Ha’u koalia tiha ona ho Prezidente Prabowo, Naktuka buat ki’ik ida, mas sé bele tinan mai ne’e mós bele hahú ona diskusaun kona-ba fronteira marítima ho Indonézia”, Xanana Gusmão dehan iha nia intervensaun durante debate Orsamentu Jerál Estadu (OJE) 2025 iha faze jeneralidade, Parlamentu Nasionál, kuarta, ohin.
Nia dehan, atu konkretiza asuntu sira ne’e presiza tau orsamentu ne’ebé ho kuantidade boot atu bele responde ba asuntu sira ne’e.
“Laos ida-ne’e mak ita hasai osan arbiru, lae, tanba sé ita la hanoin, sé ita laiha ona prinsípiu ida, ita laiha ona prátika ida kona-ba buat ida-ne’e, sim ha’u primeiru lugar ha’u sei dehan katak di’ak liu ita-nia orsamentu sira ne’e labele to’o billaun”, nia afirma.
“Maibé komu ita halo esforsu sira ne’e hotu mak ita dehan beiala sira, maromak, martir sira sei ajuda ita manán tiha funu oan ida ne’e kona-ba ita-nia soberania. Buat sira ne’e e sei bele ajuda ita tebes”, nia konklui.
Jornalista: Natalino Costa
Editór : Zezito Silva
