OÉ-CUSSE, 21 Novembru 2024 (TATOLI) – Refe Feto Timor-Leste (RFTL) realiza, ohin, konferénsia munisipál iha Rejiaun Administrativa Espesiál Oé-Cusse Ambeno (RAEOA) hodi diskute temátiku ualu atu identifika no konfere prioridade feto sira-nian, nune’e bele lori bá Konferénsia Nasionál Feto Timor-Leste (KNFTL) Daneen iha Dezembru tinan ne’e.
Konferénsia ne’e ho tema “Feto, Dezenvolvimentu no Kontemporaneidade” ho nia subtema “Feto no Dezenvolvimentu aliserse ba iha família ho nasaun”.
Prezidente Komisaun Organizadora, Merita de Jesus Marques, hateten eventu ne’e atu prepara ba konferénsia nasionál no nia objetivu primeiru mak atu fó oportunidade ba feto timoroan sira husi kamada oioin iha nivél munisipál hodi identifika no konfere prioridade feto sira-nian.
Objetivu daruak mak atu hili delegada husi RAEOA hodi partisipa iha KNFTL Daneen iha Dili hodi prodús Plataforma Asaun Foun (PoA) ba feto Timor-Leste.
“Durante loron rua, ita sei diskute prioridade temátiku ualu liga ba asuntu sosiál, kulturál, polítika no mundu kontemporáneu”, Merita Marques hato’o relatóriu preparativu iha ámbitu konferénsia ne’e.
Nia informa katak temátiku ualu ne’e mak feto no justisa, edukasaun ho kualidade ba ema hotu, saúde ba feto no família, diversifikasaun ekonómika no empoderamentu ekonómiku feto no ema vulneravel sira, partisipasaun no liderasaun iha vida polítika, inkluzividade no asuntu sosiál feto iha meiu ambiente no mudansa klimátika, ikusliu mak abordajen integradu jéneru.
Diretora Rede Feto Timor-Leste, Maria Domingas Alves, hateten, tinan ida-ne’e, RFTL prepara ba realizasaun KNFTL Daneen ne’ebé hahú ona ho elaborasaun ba rezultadu monitorizasaun ba PoA, sei valida iha konferénsia munisipál hahu husi Baucau, Viqueque, Lautém, Covalima, Ainaro, Manufahi, Aileu, Ermera, Liquiçá no Bobonaro.
“Ohin iha RAEOA, eventu ne’e halibur feto husi kamada oioin, liuliu reprezentante sira mai husi suku, postu administrativu no husi setór oioin atu diskute asuntu preokupante sira-ne’ebé afeta ba feto sira-nia moris”, dehan.
Nia esplika katak KNFTL mak eventu ne’ebé sei halibur reprezentante feto sira husi nivel munisípiu hotu, inklui RAEOA hodi aborda no halo prioridade ba asuntu ne’ebé identifika ona husi nivel munisípiu no husi monitorizasaun nian.
“KNFTL sei diskute ho kle’an preokupasaun sira ne’ebe ligada ho área temátika oioin, tanba kongresu nasionál ne’e mak eventu importante hodi fó biban ba feto timoroan sira atu diskute kestaun dezenvolvimentu, direitu umanu, liuliu iha aspetu polítiku, sosiál, kulturál, ekonómiku, justisa, empoderamentu, igualdade, inkluzaun no globalizasaun”, nia hateten.
Konferénsia Munisipál Feto Timor-Leste no Kongresu Nasionál Feto Timor-Leste Daneen realiza tanba hetan apoiu husi Uniaun Europeia, Governu Austrália, UN WOMEN, SEI, Prezidénsia Republika, ANM, Timor Gap, IGTL no Care International.
Totál orsamentu ne’ebé prevee iha proposta ba parseiru sira mak rihun $300-resin no ikus mai konsege halibur apoiu sira hamutuk rihun $295-resin.
Sekretáriu Rejionál ba Asuntu Administrasaun, André Lao, ne’ebé reprezenta autoridade RAEOA ne’e espera katak konferénsia loron rua iha Oé-Cusse bele prodús rezultadu di’ak liuhusi diskusaun ba tématiku ualu ba dezenvolvimentu direitu umanu feto iha aspetu hotu iha Oé-Cusse.
“Ha’u husu diskute liuliu abut ba problema saida mak impede feto nia partisipasaun ba dezenvolvimentu iha aspetu hotu. Nu’udar Governu sei rona imi-nia lian husi área rurál to’o urbana atu iha medida ne’ebé própria ba envolvimentu feto nian”, nia salienta.
Notísia relevante: RFTL organiza konferénsia feto nível munisipál iha Bobonaro
Konferénsia munisipál ne’e hetan prezensa husi delegada na’in-60 husi sub-rejiaun Pássabe, Oésilo, Pante Makasar no Nítibe.
Fasilitadór ba diskusaun iha área tématiku ualu ne’e mai husi Organizasaun Naun-Governamentál (ONG) sira mak hanesan Fundasaun Esperansa Oé-Cusse, ALOLA, Uma Pás Baukau, ba Futuru, AEMTL no seluk tan.
Durasaun konferénsia ne’e loron rua no iha loron ikus sei hili delegada na’in-12, ne’ebé sei reprezenta RAEOA hodi partisipa kongresu nasionál ne’ebé akontese iha Dezembru 2024, iha Dili.
Jornalista: Abílio Elo Nini
Editora: Maria Auxiliadora
