BOBONARO, 18 novembru 2024 (TATOLI) – Rede Feto Timor-Leste (RFTL), segunda ne’e organiza VI konferénsia munisipál feto Timor-Leste (TL) iha munisípiu Bobonaro durante loron rua ho tema “Feto no Dezenvolvimentu Aliserse ba iha Família no Nasaun”.
Konferénsia ne’e sei diskute temátiku prioridade ualu mak hanesan feto no justisa, edukasaun kualidade ba ema hotu, saúde ba feto no família, diversifikasaun no empoderamentu ekonómiku ba feto, partisipasaun feto iha vida públika no polítika, inkluzividade no asuntu sosiál, feto iha meiu ambiente no mudansa klimátika no abordajen integradu jéneru.
Iha konferénsia munsipál da-neen ne’e, sei fo espasu hodi halibur reprezentante feto husi nível suku, postu administrativu, liña setoriál oinoin iha munisípiu no asosiasaun feto sira no asosiasaun profisionál sira seluk.
Konferénsia munisipál sei aprezenta progresu no dezafiu implementasaun Plataforma Asaun (PoA) da-lima, diskute no identifika problema mak feto sira enfrenta liuhusi área temátika ida to’o ualu no hamosu rekomendasaun liga ho issue temátiku ualu ne’e lori ba diskute iha kongresu nasional da-neen, hodi hamosu dokumentu polítiku Plataforma Asaun (PoA).
Notisía relevante: Governu Apresia Ba Rede Feto Nia Papél iha Timor-Leste
“Loron ohin ne’e importante ba ita-boot sira, tanba preokupasaun feto Bobonaro nia ne’e sei lori ba iha nasionál fulan oin no sei halo advokasia Plataforma Asaun Kongresu ba Estadu, nune’e apoia programa ne’ebé fó ne’e aliña-aliña ho saida mak feto Timor hakarak ne’ebé ke hetan liuhusi prosesu konsultasaun nasionál ita bolu dehan kongresu,” Fundadora RFTL, Ivete de Oliveira, hateten iha salaun Cruz Vermelha Timor-Leste, Filiál Maliana.
Eis Prezidente RFTL ne’e subliña, konferénsia ne’e importante tebes oinsá atu halibur feto sira hamutuk ko’alia asuntu nasionál tanba feto hanesan inan ida ne’ebé mak hahoris nasaun.
Liuhusi konferénsia ne’e sei identifika no hili ema na’in-12 hodi reprezenta feto munisípiu Bobonaro atu ba partisipa konferénsia nasionál iha Dili ne’ebé sei akontese iha loron 10 to’o 13 fulan-dezembru tinan 2024.
“Iha Maliana asuntu saida mak ita-boot sira ko’alia, asuntu saúde saida mak sai preokupasaun feto, ambulánsia mak la bá to’o iha baze ka klínika mak ai-moruk laiha, feto atu partu mak dook ka oinsá,” nia katak.
Prezidente Komisaun Organizadora, Merita de Jesus Marques, reforsa konferénsia munisipál realiza ho intensaun maka atu mobiliza feto potensiál sira, hodi identifika prioridade situasaun Bobonaro liga ba asuntu igualdade jéneru no empoderamentu iha dezenvolvimentu integradu no inkluzivu iha Timor-Leste hodi prodús PoA foun ba feto hotu-hotu.
Biban ne’e, Sekretáriu Autoridade Munisípiu Bobonaro, Júlio Carvalho Caero, agradese ba Rede Feto Timor-Leste no konsidera liuhusi konferénsia ne’e hanesan oportunidade di’ak ba feto Bobonaro hato’o sira-nia preokupasaun.
“Husi konferénsista sira ema na’in-12 ne’e tenke seletivu, haree di’akliu, la’ós labele, haree didi’ak ida-ne’ebé mak bele ba ko’alia iha Dili, tanba problema iha munisípiu Bobonaro ne’e barak,” nia fó hanoin.
Notisía relevante: RFTL no parseiru lansa Loja Hakbiit Feto Timor-Leste
Jornalista: Sérgio da Cruz
Editór: Evaristo Soares Martins
