DILI, 05 novembru 2024 (TATOLI)—Rede Feto Timor-Leste (RFTL) hamutuk ho parseiru hanesan Adventist Development and Relief Agency (ADRA) International, Uniaun Europeia no Sekretaria Estadu ba Igualdade (SEI), tersa ne’e, lansa Loja Hakbiit Feto Timor-Leste, iha salaun Rede Feto.
“Loja hakbiit ekonomia feto ka Loja Hakbiit Feto Timor-Leste ne’e sai hanesan mehi ida ne’ebé Rede Feto no membru sira mehi iha tinan barak nia laran. Bainhira hahú iha diskusaun iha inísiu, ita hanoin katak programa hakbiit feto importante ba ita-nia luta, tanba bainhira feto ida ekonomikamente indepedente ka feto iha rasik nia obra ruma, ida-ne’e sai orgullu ida ba sira hodi bele kontribui iha foti desizaun no prevensaun ba violénsia bazeia ba jéneru,” Prezidente Konsellu Diretoria Rede Feto Timor-Leste, Zelia Fernandes, hateten iha salaun RFTL.
Notísia relevante : Rede Feto: Partisipasaun feto iha vida polítika aas tebes
Nia dehan, hafoin prosesu naruk nia laran, ohin konsege lansa loja ne’ebé la’ós deit sai hanesan fatin ka sentru hodi fa’an produtu husi inan-feton sira, maibé sai hanesan mós sentru ba informasaun no fatin diskusaun oinsá mak bele fahe esperiénsia no apreende ba malu kona-ba saida mak halo ho feto sira-nia kapasidade ne’ebé mak iha nanis ona, liu-liu iha parte prosesamentu produtu agríkola no lori bá merkadu.
Iha biban hanesan, Embaixadór Uniaun Europeia iha Timor Leste, Marc Friedrich, sente haksolok tebes no konsidera asaun ne’e importante.
“Ita hasoru malu ohin ba fulan balun de’it ona molok projetu nia rohan ne’ebé mak hala’o ona durante tinan-haat no hanesan iha okaziaun barak durante períodu ida-ne’e ita hamutuk iha ne’e liuhusi organizasaun ADRA Timor-Leste, líder ida hodi fó apoiu ba feto timoroan sira, ami la’o dook ona desde tinan 2021 no ohin ita marka momentu ida ba atinjimentu projetu ida-ne’e nia,” nia tenik.
Reprezentante ADRA Timor-Leste, Sanjay Mathew, konsidera independénsia finanseiru nu’udar xave importante ida ba empoderamentu feto hodi kombate violénsia bazeia ba jéneru.
Jornalista : Osória Marques
Editora : Julia Chatarina
