DILI, 06 agostu 2024 (TATOLI)–Prezidente Rede Feto Timor-Leste, Zelia Fernandes, hateten hafoin liu tiha tinan 25 konsulta populár (30 agostu 1999-2024) no anusiu relutadu referendu (04 setembru 1999-2024) ne’e, partisipasaun feto iha prosesu dezenvolvimentu nasionál liliu iha vida polítika iha ámbitu ukun rasik aan ne’e aas tebes.
“Tinan 25 konsulta populár iha loron 30 Agustu no rezultadu konsulta populár ba restaurasaun independénsia to’o agora, tuir Rede Feto nia haree iha progresu ne’ebé la’o di’ak tebes ba igualdade jéneru tanba feto nia envolvimentu iha vida polítika ne’e la’o,” Prezidente Rede Feto Timor-Leste, Zelia Fernandes, hateten ba Agência Tatoli, iha Parlamentu Nasionál.
Responsável ne’e haktuir, partisipasaun feto iha vida polítika ne’e hahú kedas iha 1975 no durante luta ba libertasaun nasionál ne’e, feto nia luta ba iha emansipasaun feto no oinsá korre aan husi invazór ne’e la’o tiha ona.
Iha 2000, nia hateten, feto sira reorganiza aan hodi haree no bele kontribui ba iha dezenvolvimentu nasionál iha era independénsia.
“Iha progresu lubuk ida mak la’o, iha asembleia konstitusionál dahuluk iha artigu 6 kona-ba partisipasaun feto no artigu 16 to’o 22 ko’alia kona-ba inkluzaun sosiál. Iha momentu ne’ebá, feto balun mós hola parte,” nia dehan.
Tanba, nia dehan, iha Timor-Leste mós iha lei númeru 7/2010 kona-ba violensia domestika no iha planu asaun nasionál ba violénsia bazeia ba iha jéneru oinsá atu halo protesaun, prevensaun no asiséensia legal ba vítima sira.
Buat sira-ne’e hetan apoiu hosi Governu, bainhira estabelese Fundu Gabinete Sosiedade Sivil atu nune’e bele apoia programa kapasitasaun no enpoderamentu feto iha Timor-Leste la’o nafatin.
Partisipasaun feto iha eleisaun prezidensiál mezmu la’o neneik maibé iha feto balun ne’ebé kandidata aan ba Prezidente Repúblika, maske laliu iha kompetisaun eleisaun ne’e hodi kompete ba iha kandidatura, ida-ne’e hatudu karáter nasaun demorkrasia no igualdade jéneru iha vida polítika.
Nune’e mós, nia dehan, iha eleisaun suku nian liuliu iha períodu dahuluk ne’e, feto sira kandidata aan ba xefe suku ne’e hamutuk na’in-21 mak eleitu sai xefe suku, maske resentemente tun ona ba iha 18 xefe suku, ida-ne’e hatudu katak feto sira iha área rurál partisipa ona iha asaun demokrátika.
Atualmente, nia hateten, Parlamentu Nasionál iha partisipasaun feto ne’ebé okupa persentajen boot ne’ebé bele dehan iha progresu lubuk ida.
“Debate loro-loron iha Parlamentu Nasionál halo intervensaun di’ak tebes husi feto iha nia partisipasaun la’o di’ak, ida-ne’e iha progresu di’ak,” nia hateten.
Dezafiu ba feto kontinua eziste iha área rurál
Nia hateten, feto sira-ne’ebé hela iha área rurál ne’e nafatin mantein ho sira-nia mentalidade ida katak mane de’it mak bele sai xefe família no bele kandidata aan ba xefe suku no aldeia ka kargu públiku.
“Hanoin ida sei metin, entaun feto balun lakohi kandidata aan, ida-ne’e mak sai dezafiu ida,” nia dehan.
Dezafiu seluk, nia hateten, Timor-Leste seidauk iha monitorizaun di’ak husi seguransa ba iha autór violénsia domestika.
Ezemplu, nia haktuir, iha autór balun ne’ebé hetan termu identidade rezidénsia hosi Tribunál maibé to’o ikus oho nafatin vítima.
“Kazu violénsia domestika iha nia prosesu legál iha Tribunál la’o neineik, asisténsia finanseira menus atu asesu ba iha julgamentu ho distánsia ne’ebé do’ok,” nia hateten.
Tuir nia, iha tinan ida-ne’e alokasaun orsamentu ba asosiasaun solidariedade sosiál sira hanesan Uma Mahon, Fokupers no ema ho defisiénsia ne’e menus loos, entaun oinsá mak bele serbisu ho di’ak se polítika fiskál rasik la asegura no implementasaun ne’e bele la’o di’ak, se polítika fiskál la refleta kompromisu polítika.
Prezidente ne’e hateten, dezafiu ida atuál mak persentajen feto asume kargu iha membru Governu sei menus loos tanba la atinje 20%.
“Iha munisipiu sira, feto rua de’it mak asume kargu nu’udar Prezidente Autoridade Munisipál inklui iha postu administrativu sira, signifika feto iha asume kargu membru Governu sei menus iha Governu lokál no sentrál,” nia dehan.
Jornalista : Jesuína Xavier
Editór : Cancio Ximenes
