SMAS Kovalima ezekuta osan rihun $28-resin sosa kaixaun apoia família vulneravel
KOVALIMA, 06 Novembru 2026 (TATOLI) – Servisu Munisípiu Asuntu Sosiál (SMAS) hahú Janeiru to’o Outubru ne’e, gasta ona osan $28.785 hodi sosa kaixaun hamutuk 199 atu ajuda família matebian vulneravel husi postu administrativu hitu iha Munisípiu Kovalima.
“Hahú Janeiru to’o Outubru SMAS gasta ona osan hamutuk $28. 785 sosa kaixaun ho totál kaixaun hamutuk 199 hodi fó apoiu ba família vulneravel ne’ebé mak submete pedidu ba asaun sosiál, aleinde mós translada mate-isin ba husi ospitál ba matebian sira nia hela fatin”, Diretór SMAS Kovalima,Clementino Bere, relata dadus ne’e ba TATOLI , iha Bairru Kosta.
SMAS ajuda apoiu kaixaun ba familia matebian sira bazeia baze dekretu-lei 21/2008 no transporta hodi tula mate-isin husi kapitál Kovalima ba postu Administrativu sira mak hanesan, Fatululik, Fatumea, Fohorem, Tilomar, Maucatar, Suai no Zumalai.
Bazeia ba dadus katak durante fulan-9, SMAS ajuda apoiu kaixaun hamutuk 199. Husi númeru ne’e iha trimestre dahuluk apoiu kaixaun 51 ho nia orsamentu $8,190 ba trimestre daruak hamutuk 55 ho nia orsamentu $7.620 ba trimestre datoluk kaixaun 61 ho totál orsamentu $9. 040 no iha fulan Outubru ne’e hamutuk 32 ho totál orsamentu $3,935.
Iha orsamentu 2026, Autoridade Munisipiu Kovalima prevee orsamentu atu sosa kaixaun ba servisu munisípiu Asaun Sosial hamutuk rihun $50 husi orsamentu referidu gasta ona $28.785 no saldu atual iha $21,215.
SMAS fó apoiu kaixaun bazeia ba pedidu husi xefe suku sira ho nia medida kaixaun no presu kaixaun la hanesan kada kaixaun ho nia folin mak kaixaun ho medida boot folin $170, kaixaun natoon ida ho folin $95 no kaixaun ho medida ki’ik ida ho folin $60.
Notisia relevante: MSSI tinan ne’e prevee rihun $150 hodi sosa kaixaun hamutuk 1.044
Jornalista: Celestina Teles
Editór: Florencio Miranda Ximenes
