DILI, 04 Setembru 2025 (TATOLI)–Ministériu Solidariedade Sosiál no Inkluzaun (MSSI) aloka ona osan $150.000 iha tinan ne’e hodi sosa kaixaun hamutuk 1.044, hodi oferese ba família vulnerável ne’ebé presiza.
“Kaixaun hamutuk 1.044 atu fasilita ba matebian hahú idade labarik to’o ema boot sira,” Diretór Jerál MSSI, Florencio Pina Dias Gonzaga informa ba Jornalista Ajénsia TATOLI, iha nia knaar fatin, Kaikoli, Kinta ne’e.
Notísia relevante : SMAS Kovalima apoia ona kaixaun 51 tulun família matebian kbiit-laek
Husi totál kaixaun ne’ebé iha, MSSI oferese ona 739 ba família matebian sira ne’ebé presiza no daudaun falta 305.
“Kaixaun to’o ka la to’o ita nafatin kontinua buka meiu hodi fasilita ba matebian sira, signifika MSSI buka maneira extra, hakarak ka lakohi bainhira matebian iha, ita nafatin buka solusaun atu fasilita,” nia akresenta.
Antes ne’e, Governu aprova $26.188.602 iha proposta Orsamentu Jerál Estadu (OJE) 2025 hodi kontinua fó prioridade ba programa no atendimentu sosiál ba povu.
“Orsamentu tinan ne’e fahe ba kategoria saláriu no vensimentu $3.982.088, bens no servisu $10.744.951, transferénsia públika $9.501.672, kapitál menór $500.000 no kapitál dezenvolvimentu $1,459.891. Ami iha programa prioridade rua mak hanesan dezenvolvimentu instituisionál no rua servisu no atendimentu sosiál,” Ministra Solidariedade Sosiál no Inkluzaun, Verónica das Dores informa.
Jornalista : Osória Marques
Editora : Julia Chatarina
