KOVALIMA, 07 Abríl 2025 (TATOLI) – Servisu munisipál asaun sosiál (SMAS), iha trimestre dahuluk ne’e – Janeiru, Fevereiru, Marsu, fó apoiu ona kaixaun unidade 51 hodi tulun ba família matebian kbiit-laek sira, Diretór Clementino Bere, relata.
SMAS bainhira fó apoiu kaixaun, tuir diretór ne’e, bazeia ba simu pedidu husi xefe suku sira, hafoin husi SMAS hatuun despaixu ba empreza atu tula kaixaun bazeia ba medida kaixaun ne’ebé mak presiza.
“Ami kontinua fó apoiu kaixaun ba família kbiit-laek sira bainhira xefe suku sira submete pedidu mai iha Servisu munisipál asaun sosiál, nune’e durante iha trimestre ba dahuluk fó apoiu ona kaixaun hamutuk unidade 51”, Dirijente, Clementino Bere, informa ba jornalista sira, iha Bairru Costa, ohin.
SMAS apoia kaixaun, nia dehan katak, bazeia ba simu pedidu husi xefe suku ne’ebé mak husu atu fó apoiu kaixaun ba família matebian sira ne’ebé presiza tulun fó sira hodi halot mate-isin ka kadáver sira.
Regra atu fó apoiu kaixaun bainhira mate presiza lori dokumentu sira hanesan fotokopia kartaun eleitorál matebian ho família matebian ,lori deklarasaun husi xefe Suku hodi hato’o karta pedidu hafoin SMAS haree nia medida kaixaun hodi halo despaixu ba empreza fó apoiu kaixaun.
Kaixaun unidade 51 ne’ebé mak fó apoiu ho medida la hanesan mak hanesan, medida ki’ik sentrimetru 60-80 hamutuk 13, ho nia folin kada kaixaun $ 60, ba fulan tolu gasta osan $ 780.00, medida naton sentimetru 95-130 tolu ne’ebé kada kaixaun folin $ 95.00 ba kaixaun tolu gasta ona osan $ 285.00 no medida boot sentimetru 140-200 ho nia folin kada kaixaun $ 170. Nune’e, totál kaixaun 18 gasta ona osan hamutuk $ 5,950.00
Orsamentu Jerál Estadu aloka ba Servisu munisipál asaun sosiál uza hodi apoia kaixaun ba 2025 ne’e hamutuk $ 59.000.00. Husi montante orsamentu ne’e trimestre dahuluk SMAS gasta ona verba hamutuk $ 7,015.00 balansu $ 42,985.00.
“Ha’u-nia obervasaun orsamentu rihun $ 59 ne’e sufisente uza hodi apoiu kaixaun ba família matebian sira ne’ebé mak submete pedidu atu fó apoiu kaixaun hodi haloot mate-isin”, nia hateten.
Notísia relevante:SMAS ezekuta ona osan rihun lima-resin sosa kaixaun apoia família vulneravel
Jornalista: Celestina Teles
Editór: Rafael Ximenes de A. Belo
