KOVALIMA, 11 Marsu 2025 (TATOLI) –Hahú Janeiru to’o Fevereiru ne’e, Servisu Munisipál Asaun Sosiál (SMAS) gasta ona osan hamutuk $ 5,225 hodi halo akizisaun ba kaixaun hodi fó apoiu ba família vulneravél sira iha munisípiu Kovalima.
Diretór Servisu Munisipál Asaun Sosiál Clementino Bere relata katak, SMAS durante fulan rua apoiu ona kaixaun hamutuk 37 ne’ebé gasta ona osan hamutuk $ 5,225 sosa kaixaun hodi apoia família vulneravel sira.
“Hahú Janeiru to’o Fevereiru ne’e atende ona pedidu ne’ebé submete ba Asaun Sosiál hodi fó apoiu kaixaun ne’ebé ita gasta ona osan hamutuk gasta ona osan $ 5,225 ne’ebé daudaun ne’e seidauk halo pagamentu hein Marsu foin halo pagamentu”, Clementino Bere informa ba TATOLI iha nia servisu fatin, ohin.
Dirijente ne’e esplika katak SMAS halo kooperasaun ho empreza Raius Camenasa hahú 2022 to’o ohin loron mak fornese kaixaun ne’ebé daudaun ne’e seidauk halo pagamentu hein Marsu mak foin halo pagamentu.
Kritériu SMAS atu fó apoiu kaixaun ne’e katak, presiza lori deklaraun husi xefe suku , foto kopia Kartaun eleitorál (KE) husi matebian no reprezenta família matebian nia Kartaun eleitorál (KE) .
Kaixaun 37 apoiu ba família matebian ne’ebé submete pedidu ba Servisu Munisipál Asaun Sosiál ne’ebé durante apoiu barak husi Postu administrativu Suai, Zumalai, Fatumea no Fatululik ladun barak tanba haree ba kondisaun estrada aat nune’e família matebian sira rasik mak aranja.
Kaixaun ne’ebé fó apoiu ho nia medida sira hanesan, medida ki’ik hamutuk sia ho nia folin kada kaixaun hamutuk $ 60.00 ne’ebé gasta ona osan $ 540.00.
Kaixaun ho medida naton ida (1) ho nia folin kada kaixaun $ 95.00 no kaixaun ho medida 140×200 sentimetru hamutuk 27 ne’ebé kada kaixaun ho nia folin $ 170.00 ne’ebé gasta ona osan $ 4,590.
Jornalista: Celestina Teles
Editór: Rafael Ximenes de A. Belo
