DILI, 03 dezembru 2024 (TATOLI) – Institutu Defeza Nasionál (IDN) hala’o abertura dahuluk ba kursu kapitaun iha tinan ida-ne’e ba ema 23.
Kursu ida-ne’e hola parte husi membru forsa komponente navál, membru unidade polísia marítima (UPM) no membru husi autoridade maritima nasionál (AMN). Kursu ne’e kompostu husi mane 21 no feto na’in-rua no durasaun ba kursu ne’e fulan lima, sei hahú husi dezembru 2024 no konklui iha fulan-Marsu 2025.
Diretór Interinu Institutu Defeza Nasionál (IDN) Guilherme Soares, hateten kursu ida-ne’e realiza hanesan formasaun espesífiku ba kapitaun sira iha Portu Timor-Leste no nia adjuntu sira.
“Kursu ne’e mak atu kontribui hodi garante interese sira husi Timor-Leste iha tasi, kontribui ba ezersísiu autoridade husi Timor-Leste iha tasi ne’ebé efisiente no efetivu no atu kontribui ba kapasita autoridade marítima hodi fasilita nia misaun”, Guilherme Soares iha nia intervensaun bainhira hala’o abertura ba kursu dahuluk ba kapitaun sira iha Palásiu Governu ne’ebé TATOLI, tersa, ohin.
Guilherme hateten, matéria sira ne’ebé aprende iha kursu ne’e koalia liu kona-ba kestaun tasi nian, oinsa atu hasae koñesimentu kontrola tasi.
Nia dehan, formasaun ne’e iha aula teória no aula prátika no hanorin ho lian Portugés, Inglés no Tetum. Nune’e mós dosente sira sei aprezenta no uza kazu prátika sira hodi ajuda partisipante sira komprende matéria ne’ebé ensina.
Nia dehan, kursu ne’e nudar orgullu ida tanba IDN hahú edisaun dahuluk hodi fó kursu kapitaun Portu. Tanbá tasi ne’e signifikante tebes iha dezenvolvimentu kapasidade tasi no Portu Timor-Leste nian.
¨Kursu ida-ne’e reflete ita-nia nasaun nia kompromisu atu hametin ezersísiu autoridade Estudu tasi nian. Hamutuk ho padraun internasionál no nesesidade espesífiku sira husi ita-nia realidade”, nia adianta.
Nia dehan, Timor-Leste, nu’udar Estadu marítimu ida-ne’ebé iha fatin estratéjiku ida, nu’udar rejiaun ida-ne’ebé iha relasaun globál ne’ebé boot liu, ida-ne’ebé iha natureza ida-ne’e, obriga ita atu konsolida ita-nia prezensa iha espasu marítimu sira.
Diretór IDN Interinu ne’e mós agradese ba autoridade marítima no ema hotu ne’ebé envolve iha organizasaun kursu ida-ne’e, ne’ebé sei sai nu’udar pilár importante ida hodi harii futuru tasi nian iha ita-nia rai.
Iha fatin hanesan, Kapitaun Mar e Guera Adão Brito “Jeky” hatutan, Kursu ohin ne’e realiza iha IDN, ne’e primeiru pasu importante ida ba ita timor atu loke ita-nia pensamentu ba ita-nia tasi rasik, hanesan nasaun soberanu ida, ita hatene ita-nia area marítima ne’e boot liu ita-nia rai maran, kuaze 17. 500 kilometru kuadradu
Jornalista: Natalino Costa
Editór : Zezito Silva
