DILI, 16 Maiu 2026 (TATOLI) – Índise Presu Konsumidor (IPK) fulan-Maiu rejista inflasaun 0,2% kompara ba fulan-Abríl 2026 iha deflasaun 0,8%.
Prezidente Institutu Nasionál Estratístika Timor-Leste (INETL), Elias Ferreira, esplika katak mudansa presu grupu hotu sa’e 0,2% tanba hetan kontribuisaun husi grupu transporte hamutuk 1,1%, uma 0,4% no hahán no bebidas la’ós alkoólika 0,5%.
Tuir nia, ba grupu alkohol no tabaku tun 0,5%, no ekipamentu no manutensaun mobiliáriu uma-laran tun 0,8% sai hanesan mudansa kontráriu ba inflasaun mensál grupu hotu.
“Ita-nia grupu grupu hahán no bebida la’ós alkoólika sa’e 0,5% tanba hetan impaktu maioria husi subgrupu foos sa’e 1,6% susu-been, keiju no manu-tolun 1,5%, ikan no hahán tasi sa’e 2,0%, modo-tahan sa’e 0,5% no ai-fuan 0,2%”, Elias Ferreira hateten lihuhosi konferénsia imprensa ne’ebé hala’o iha INETL, ohin.
Nia subliña katak ba subgrupu masin-midar, marmelada, bani-been, xokolate no hahán midar tun 1,4%, mina no bokur 0,3%, kafé, xá no kokoa 0,4% no produtu ai-han 0,7% sai hanesan mudansa kontráriu ba inflasaun grupu hahán no bebida la’ós alkoólika ba Maiu 2026.
Nia esplika mudansa persentajen IPK anuál sa’e 0,4% kompara entre fulan-Maiu t2026 hoMaiu 2025, hetan kontribuisaun husi grupu hahán no bebida la’ós alkoólika sa’e 0,7%, transporte 6,9%, edukasaun 0,3%, uma 0,4% no hatais no sapatu 0,2% ba anuál Maiu 2026.
Nune’e, ba grupu alkohol no tabaku tun 2,7%, ekipamentu no manutensaun mobiláriu uma-laran 1,1%, rekreasaun no kultura 0,6% no komunikasaun 0,3%, ida-ne’e sai hanesan mudansa kontráriu ba inflasaun grupu hotu ba anuál Maiu 2026.
Kona-ba inflasaun tradeable sa’e 0,3% no non-tradeable mós sa’e 0,3% iha mensál. Kompara entre fulan-Maiu 2026 no fulan-Abríl 2026.
Inflasaun Tradeable sa’e 0,3% no non-tradeable mós sa’e 1,0% iha anuál, kompara entre fulan-Maiu tinan-2026 no Maiu 2025.
Notísia relevante: IPK Abríl rejista deflasaun 0,8%
Jornalista: Arminda Fonseca
Editora: Maria Auxiliadora
