DILI, 11 dezembru 2024 (TATOLI)–Diretór Nasionál Ortikultura iha Ministériu Agrikultura, Pekuária, Peska no Floresta (MAPPF), Lucio Ramiro Ribeiro, hateten MAPPF aloka orsamentu adisionál hamutuk rihun $100 hodi sosa fini batar no hare atu fahe ba agrikulór sira iha munisipiu.
Nia esplika, MPPF tau alokasaun orsamentu adisionál hodi sosa fini sira-ne’e tanba agrikulór afeta hosi alterasaun klimátika ne’ebé kuda batar balun la moris.
“Daudaun ne’e, distribuisaun fini batar ne’e agrikultór sira kuda moris hotu ona. Tonelada 80 ne’e distribui hotu ona. Ita haree ba iha mudansa klimatika, udan-been ladun tuir normál, entaun promove adisionál balun ba tonelada 20 hanesan ne’e. Agora kompañia halo kompras hela atu batar sira-ne’ebé kuda la moris, kompañia bele halo distribuisaun,” diretór ne’e hateten ba Agência Tatoli iha sorumutu atu hodi hanoin hamutuk ba kondisaun reál relasiona ho asuntu “Agrikultura, saúde, bee-moos, edukasaun hodi buka dalan ba hatan dezafiu sira”, iha salaun UCT iha Balide.
Husi tot’al osan ne’e, nia dehan, MAPPF fahe osan 50% hodi sosa fini batar no osan 50% sosa fini hare ba agrikultór sira.
“Fini hare ne’ebé ita distribui ne’e iha tonelada 100, maibé ita mós tau adisionál tonelada 20, tan ne’e total tonelada hare hamutuk 120,” nia dehan.
MAPPF mós agora distribui hela fini hare ba agrikultór sira hodi bele kuda, tanba époka kuda haree mós besik ona.
“Ita hahú ohin no aban ba oin sei distribui, tanba preparasaun ba primeira époka sei kuda iha dentru janeiru to’o marsu,” nia hateten.
Jornalista : Jesuína Xavier
Editór : Cancio Ximenes
