DILI, 16 janeiru 2025 (TATOLI)—Tribunál Judisiál Primeira Instánsia Suai liuhusi Juiza Patrícia de Araújo Xavier hatún despaixu hodi aplika Termu Identidade Rezidénsia (TIR) ba arguidu GdSM ne’ebé suspeita lori kilat-musan tama mai iha fronteira Batugade iha domingu (12/1/2025).
Razaun Tribunál aplika TIR ba iha arguidu tanba hafoin Tribunál rona tiha depoimentu husi arguidu durante iha prosesu interrogatóriu dahuluk ne’ebé hala’o iha Tribunál Judisiál Primeira Instánsia Suai, kuarta (15/1/2025), nune’e Tribunál haree katak laiha indísiu ruma ba krime, tanba ne’e Tribunál hatún despaixu hodi aplika Termu Identidade Rezidénsia ba arguidu GdSM.
“Ha’u sertifika katak iha loron kuarta (15/1/2025), tuku 14:20 Otl, fó liberdade ba arguidu naran Gilberto dos Santos Menezes, hela fatin aldeia Pissu Kraik, Suku Lauhata, Postu Administrativu Bazartete, Munisípiu Liquiçá,” sita husi despaixu Tribunál nian ba arguidu ne’ebé TATOLI asesu, kinta ne’e.
Notísia relevante: http://Xanana lamenta timoroan lori kilat musan tama iha fronteira batugade
Iha desizaun ne’e, Juiza Patrícia mós deside hodi devolve filafali kilat-musan ne’ebé molok ne’e aguidu GdSM lori tama mai fronteira Batugade.
Kilat-musan ne’e nu’udár objetu apreendidu ne’ebé antes ne’e autoridade seguransa apreende husi arguidu GdSM.
Rekorda fali katak iha domingu (12/1/2025), tuku 11:15 Otl, Servisu Nasionál Intelejénsia (SNI) no Alfándega asegura suspeitu na’in rua ho inisiál GdSM no OLSG tanba deskonfia lori kilat-musan ualu tama mai fronteira Batugade hafoin fila husi NTT-Indonézia.
Suspeitu na’in rua ne’e Alfándega no SNI asegura hafoin mákina X-Ray deteta katak sidadaun rua refere lori kilat-musan ualu. Aleinde asegura suspeitu na’in rua ne’e, asegura mós telefone ida. Kazu ne’e Ministériu Públiku rejista ho númeru: NUC0020/25.PNSIC.
Jornalista: Natalino Costa
Editór: Xisto Freitas da Piedade
