VIQUEQUE, 01 fevereiru 2025 (TATOLI)- Administradór postu Uatulari, munisípiu Viqueque hamutuk ho komunidade, sábadu ne’e, lansa fatuk dahuluk ba reabilitasaun estrada rurál husi diresaun Nunumalau, suku Afaloikai bá aldeia Iraler, suku Matahoi ho kilométru 2.500.
Biban ne’e, Administradór postu Uatulari, Jorge Ribeiro, dehan, Projetu ne’e ka’er husi Empreza Bere is Back hanesan Uatulari-oan ne’ebé tenke garante kualidade hodi hodi fasilita komunidade sira-ne’ebé hela iha área rurál.
“Ohin, ita lansa projetu ne’e no empreza hahú ona sira nian serbisu. Nune’e ha’u husu ba empreza atu garante nia kualidade tanba nu’udar Uatulari-oan presiza halo ho kualidade atu fasilita komunidade sira hodi lori produtu lokál bá merkadu”, Administradór postu ne’e hateten, iha serimónia lansamentu projetu reabilita estrada rurál, iha Nunumalau, ohin.
Autoridade ne’e husu ba komunidade no veteranu sira atu labele halo impedimentu ba projetu ne’e, atu empreza bele servisu ho di’ak.
“Ha’u husu aman veteranu no komunidade tomak fó apoiu ba empreza, atu obra ida-ne’e la’o ba oin labele iha impedimentu”, nia apela.
Iha biban hanesan, Komadante Polísia Nasionál Timor Leste (PNTL) Eskudra Uatulari, Pedro F. da C. Carvalho, husu ba komunidade hotu atu kontribui ba garante seguransa ba empreza atu hala’o servisu.
“Ha’u husu ba komunidade iha Nunumalau no Iraler, atu apoia empreza implementadór hodi garante seguransa iha iha fatin konstrusaun projetu ida-ne’e to’o ramata”, Komandante ne’e sujere.
Entretantu, Xefe suku Afaloikai, Cesário N. Pires, sente orgullu ba empreza tanba ho fuan bo’ot bele mai ka’er obra ida-ne’e hodi fasilita komunidade sira hodi asesu ba merkadu no fasilidade saude sira.
“Ha’u husu ha’u-nia xefe aldeia sira no komunidade sira tau-matan ba empreza sira nian ekipamentu atu servisu to’o ramata,”Autoridade suku ne’e apela.
Diretór empreza Bere is Back UNP Lda, Luis Bernardo Gamboa, hateten empreza sei implementa bázeia dezeñu ne’ebé empreza simu ho durasaun servisu to’o Novembru 2025.
“Ami labele promete hotu tuir durasaun tempu tanba depende ba klima. Ba obra ida-ne’e ami sei envolve traballdór husi husi suku Afalokai no Matahoi”, nia afirma.
Projetu reabilitasaun estrada rurál ne’e implementa husi Empreza Bere is Back, ho pakote konstrui dainajen no cor estrada husi 0+00-2+500, bronjon no ponte ki’ik rua ho totál orsamentu hamutuk $632,073.34. Nune’e projetu referidu sei supervisiona husi tékniku Ministériu Obra Publika (MOP).
Konvidadu sira ne’ebé partisipa iha serimónia lansamentu projetu rurál ne’e husi komunidade, autoridde lokál seguransa, tékniku Obra Públika munisípiu Viqueque, no veteranu.
Jornalista : Vitorino Lopes da Costa
Editór : Florencio Miranda Ximenes
