BOBONARO, 03 fevreiru 2025 (TATOLI)—Prezidente Autoridade Munisípiu (PAM) Bobonaro, Alexandre Pires, segunda ne’em inaugyra edifisíu foun Diresaun Servisu Munisipál Agrikultura no Diresaun Servisu Munisipál Agua no Saneamentu ne’ebé konstrui ho orsamentu Planu Integradu Dezembolvimentu Munisipál (PDIM) 2024.
Nia husu ba diretór Servisu Munisipál Agrikultura no SMASA atu kontrola funsionáriu sira servisu ho dixiplina no pontualidade hodi presta atendimentu ba komuniade ho di’ak liután.
Notísia Relevante: PAM Bobonaro lansa projetu PDIM 2024
“Ha’u sadik nafatin funsionáriu Diresaun rua, SMASA no Agrikultura tenke halo mudansa servisu. Se edifisíu foun, servisu lentu nafatin ha’u haruka muda imi. Entaun, tenke servisu ho di’ak tanba ita-nia populasaun barak sei presiza apoia. Imi tun ba baze enkontru ho xefe suku no xefe aldeia sira, nune’e hatene saida mak sira presiza, saida mak sira hakarak. Ita hahú, se osan laiha, ita tau ba planu,” Nia hato’o intervensaun iha serimónia inaugurasaun ba edifísiu foun, iha edifisíu foun Diresaun Servisu Munisipál Agrikultura.
Edifisíu foun rua ne’e hansan obra ida-ne’ebé Munisípiu Bobonaro prepara ba avaliasaun kondisaun mínimu antes Governu implementa polítika Poder lokál no desentralisaun administrativa.
“Ida-ne’e labele dehan obra ha’u-nian, obra ne’e obra koletivu, ita hotu nian, hahú husi sira seguransa mai to’o ita sira lidera Diresaun. Ita hotu nian, la’ós ema ida-nian, ema ida sei la halo buat ida,” Alexandre Pires hatete.
Administradór postu administrativu Maliana, Agusto Caetano, reforsa obra ne’e nu’udar planu Governu Konstitusionál da-ualu (VIII) nian ne’ebé trasa iha tinan 2023.
“Ohin, ita Maliana marka diferensa, tanba inaugura oma edifísiu rua kedas. Iha semana liubá mós inaugura tiha ona Pousada. Iha tinan ne’e mós ita-nia Prezidente Autoridade Munisípiu ho ita hotu halo esforsu hetan obra rua mak ida sala maternidade no ida irrigasaun,” nia dehan.
Biban ne’e, Diretór Servisu Munisipál Agrikultura Munisípiu Bobonaro, Longuinhos João, hato’o ahradesimentu ba Autoridade Munisípiu Bobonaro tanba bele konstrui edifisíu ne’ebé dignu no seguru hysi udan no loron manas.
“Ita hotu hatene katak edifisíu ne’e aat liu iha Munisípiu Bobonaro, servisu hotu ladi’ak, kuandu udan kolega sira arkivu ne’e tenke tula sa’e iha armariu leten. Maibé, ohin, ami hetan edifisíu foun, ne’e la’ós horkalan mehi mak ohin mai halo inaugurasaun, ne’e liuhusi prosesu naruk. Ema Diresaun Barak mak presiza sasán hirak ne’e, infelizmente Agrikultura Munisípiu Bobonaro mak hetan. Edifisíu foun ne’e la’ós importante, maibé importante mak ita atu halo atendimentu ba ita-nia agrikultór sira ho di’ak liután,” Longuinhos dehan.
Enkuantu edifisíu foun SMSAS ne’e konstrui husi kompañia lokál Regenciv Unipesoál, Lda, ho kustu $132,297,90 no edifisíu Diresaun Servisu Munisipál Agrikultura konstrui husi kompañia Rilmar Unipesoál, Lda, ho kustu $195,821.73.
Notísia Relevante: CCM Bobonaro aprova planu prioridade 49 ba PDIM 2024
Jornalista : Sergio da Cruz
Editór : Cancio Ximenes
