BOBONARO, 29 abríl 2024 (TATOLI)-Prezidente Autóridade Munisipál Bobonaro, Alexandrino Pires, segunda ne’e ofisialmente lansa fatuk dahuluk ba projetu Programa Dezenvolvimentu Intregadu Munisipál (PDIM) tinan 2024.
Projetu ne’ebe halo lansamentu ne’e hamutuk lima kompostu hosi konstrusaun barrajen satán mota Bauriku hodi proteje eskola EBC 4 Janeiru Koelima, suku Atabae, konstrusaun sala aula tolu iha Eskola Sekundariu Jerál Samara Balibo, konstrusaun edifísiu Servisu Munisipál Agrikultura, Servisu Munisipál Água no Saneamentu e Ambiente no Konstrusaun Irrigasaun iha Raigeren ba Raboanan, suku Raifun ho distánsia kilómetru tolu hodi fornese bee ba agrikultór sira-nia natar.
Prezidente Autoridade Munisipál Bobonaro, Alexandrino Pires, apela ba empreza konstrutora atu implementa projetu hirak-ne’e ho responsablidade, kualidade no finaliza tuir durasaun kontratu.
Nia mos apela ba líder komunitária, entidade estádu nian iha nível baze atu koordena malu hodi tau-matan ba projetu hirak-ne’e, nune’e bele la’o ho susesu hodi responde ba esperansa povu no estudante sira-nia.
Notísia relevante: Autoridade Bobonaro sei implementa projetu PDIM 13
“Ita-nia kalendáriu halo servisu ne’e badak, entaun labele falla, komapañia tenke bazeia ba oráriu, ami halo akordu hamutuk, tanba durante ha’u-nia mandatu, ha’u extende dala ida de’it,nba dala rua,bha’u re-tender, singnifika troka kompañia, maibé ha’u-nia esperansa katak sira sei hahú, ne’ebé hau ezije mak kualidade,” nia hateten.
Prezidente Autóridade Munisipál Bobonaro mos apela ba trabaladór sira atu servisu tuir orientasaun tekniku no matadalan ne’ebé hatur ona iha obra ne’e.
Adjuntu Komandante Komandu Polisía Munisípiu Bobonaro, Asistente Superintendente José Casemiro de Carvalho, dehan, ba oin sei orienta eskuadra Atabae koloka membru Ofisiál Suku (OPS) atu halo kontrola másimu hodi garante seguru durante implementasaun projetu.
“Ha’u lori komandante munisípiu nia naran, lakohi rona problema akontese iha-ne’e, tanba konstrusaun ne’ebé ke la’o iha-ne’e, la’ós esperansa ema ida nia deit,nmaibé esperansa povu hotu-hotu nia hakarak hetan projetu ida ke ho kualidade no hetan seguransa ida ke di’ak,” nia hateten.
Xefe suku Atabae, Juvinál Reis Cardoso, senti kontenti no orgulu ho atividade referidu, tanba komunidade no parte eskola hein obra ne’e kleur ona.
“Ninia prosesu ne’e kleur la halimar, kuaze tinan hitu nia laran, ohin mak foin realiza obra ida-ne’e,;hanesan Autoridade ami apresia tebes, tanba ho obra ida-ne’e bele proteje ona eskola ida ne’e hosi mota,” nia katak.
Tuir orariu, atividade lansamentu ne’e aban loron (30/04) ne’e hala’o mos iha postu administrativu Cailaco ho nia projetu sira mak hanesan konstrusaun merkadu sentrál Marco, konstrusaun barrajen iha mota Maumela I no II,bhafoin ne’e kontinua ba postu administrativu Maliana mak hanesan konstrusaun merkadu Mau-Mali, reablitasaun edifísiu pouza iha Pemancar, aldeia Achulaka,nsuku Lahomea.
Nune’e mós ontinua ba postu administrativu Bobonaro ho nia projetu mak hansan konstrusaun postu saúde no rezidensia pesoál saúde iha suku Molop, reablitasaun estrada Mazop,nsuku Ai-asa,bnune’e mos ba postu administrativu Lolotoe mak hansan konstrusaun Bee mos ho sistema gravitasaun iha suku Lontas no konstrusaun bee mos iha suku Deudet.
Enkuantu projetu 13 ne’e sei gasta orsamentu hamutuk millaun $2 resin.
Notísia relevante: Saúde Bobonaro propoin projetu hitu iha PDIM 2024
Jornalista: Sérgio da Cruz
Editór: Evaristo Soares Martins
